საზოგადოება

კონკურენციის პოლიტიკა და ფარმაცევტული სექტორი - საჯარო უწყებებისა და ბიზნესის წარმომადგენლებისათვის სემინარი ჩატარდა

საქართველოს კონკურენციის სააგენტოს თავმჯდომარემ ნოდარ ხადურმა სემინარი გახსნა თემაზე - „კონკურენციის პოლიტიკა და ფარმაცევტული სექტორი“. შეხვედრას ასევე ესწრებოდნენ - ბიზნესომბუდსმენი, ირაკლი ლექვინაძე; საქართველოს სახალხო დამცველის აპარატის; საქართველოს პარლამენტის ჯანმრთელობის დაცვისა და სოციალურ საკითხთა კომიტეტის; საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს წარმომადგენლები; ასევე ევროპული ბიზნეს ასოციაციის ხელმძღვანელი საქართველოში, დევიდ ლი; რუმინეთის კონკურენციის საბჭოს წამყვანი ექსპერტი კონკურენციის დარგში, სორინ ლუნგუ; რუმინეთის კონკურენციის საბჭოს კონკურენციის ინსპექტორი, დიანა ვარზარუ; ევროკავშირის პროექტის გუნდის ხელმძღვანელი/წამყვანი ექსპერტი სამართლებრივ საკითხებში, აურელიო ლა ტორე და სხვა მოწვეული სტუმრები.

სამუშაო შეხვედრის მიზანია, საჯარო უწყებებს, ბიზნესის წარმომადგენლებს და სხვა დაინტერესებულ მხარეებს შორის ფარმაცევტულ სექტორში კონკურენციის პოლიტიკის პრობლემატურ საკითხებთან დაკავშირებით კონსტრუქციული დისკუსიის გამართვა. განხორციელებული შეხვედრების შედეგად, ადგილობრივი და საერთაშორისო ექსპერტების თანამონაწილეობით, შესაძლებელი გახდება ქართული ფარმაცევტული სექტორისთვის მიმართულებების ჩამოყალიბება, რაც ხელს შეუწყობს კონკურენტული გარემოს გაუმჯობესებას და შესაბამის ბაზარზე პოზიტიური შედეგების დროულ ასახვას. რაც თავის მხრივ, კონკურენტული გარემოს გაუმჯობესებასა და მომხმარებელთათვის მეტი სარგებლის უზრუნველყოფას შეუწყობს ხელს. ასევე, კონკურენციის აღსრულებას ფარმაცევტულ სფეროში და კერძო სექტორის როლს აღნიშნულ პროცესში.

სახალხო დამცველის რეკომენდაციებზე დაყრდნობით, კონკურენციის სააგენტოს ფარმაცევტული ბაზრის მონიტორინგის გეგმის შემუშავება დაევალა. ამ ეტაპზე, მუშაობა აქტიურ ფაზაშია და მოსამზადებელი სამუშაოები მიმდინარეობს. ევროკავშირის ქვეყნების გამოცდილების გაზიარება უმნიშვნელოვანესი ფაქტორია, რომლის მხრივაც, რუმინეთი ერთ-ერთ კარგ მაგალითს წარმოადგენს, სადაც სამართლიანი ბიზნეს გარემოს ფორმირებისა და მომხმარებელთათვის უკეთესი პირობების უზრუნველყოფის მიზნით, ეფექტიანი ღონისძიებები გატარდა.

21-22 ნოემბერს დაგეგმილია სემინარები საქართველოს კონკურენციის სააგენტოს თანამშრომლებისათვის. სამუშაო შეხვედრები საქართველოს კონკურენციის სააგენტოს და ევროკავშირის პროექტის „საქართველოს კონკურენციის სააგენტოს მხარდაჭერა“ ორგანიზებით ხორციელდება.