საზოგადოება

კონკურენციის სააგენტოსა და ევროკავშირის პროექტის ორგანიზებით, თემაზე - ბიზნეს ასოციაციების საქმიანობის თავისებურებანი კონკურენციის სამართლის ჭრილში, შეხვედრა მიმდინარეობს

საქართველოს კონკურენციის სააგენტოსა და ევროკავშირის პროექტის „საქართველოს კონკურენციის სააგენტოს მხარდაჭერა“ ორგანიზებით, ბიზნეს ასოციაციების წარმომადგენლების მონაწილეობით შეხვედრა იმართება თემაზე: „ბიზნეს ასოციაციების საქმიანობის თავისებურებანი კონკურენციის სამართლის ჭრილში“.

სამუშაო შეხვედრას ხელმძღვანელობენ: საქართველოს კონკურენციის სააგენტოს თავმჯდომარის მოვალეობის შემსრულებელი დავით ჭიჭინაძე, ევროკავშირის პროექტის გუნდის ხელმძღვანელი აურელიო ლა ტორე, ლიეტუვას რესპუბლიკის კონკურენციის საბჭოს თავმჯდომარე შარუნას კესერაუსკასი და კონკურენციისა და ევროკავშირის სამართლის ექსპერტი დანიელ კოლგანი.

„სემინარი მიზნად ისახავს ასოციაციების სათანადო ინფორმირებას კონკურენციის საწინააღმდეგო სავარაუდო რისკებთან დაკავშირებით, რათა ასოციაციების ფარგლებში არ წარმოიშვას კონკურენციის საწინააღმდეგო შეთანხმებების ფორმირების საფრთხე. მოწვეული ექსპერტები, სემინარზე დამსწრე საზოგადოებასთან ერთად, კითხვა-პასუხის რეჟიმში მსჯელობენ ისეთ მნიშვნელოვან საკითხებზე, როგორიცაა: ზოგადი რისკები, რომლებიც ბიზნეს ასოციაციების გადაწყვეტილებებს და მათ წევრთა შორის ინფორმაციის გაცვლას უკავშირდება; პრაქტიკული მაგალითები ლიეტუვას და ევროკავშირის სხვა ქვეყნების გამოცდილებიდან; ბიზნეს ასოციაციების საქმიანობასთან დაკავშირებული საფრთხეები კონკურენციის შემზღუდავი შეთანხმებების კონტექსტში, როგორ უნდა მოხდეს რისკების თავიდან აცილება და ა.შ.“ - ნათქვამია კონკურენციის სააგენტოს მიერ გავრცელებულ ინფორმაციაში.