პოლიტიკა

კონსტიტუციური კანონის პროექტის საჯარო განხილვა სატელევიზიო ფორმატში, საზოგადოებრივი მაუწყებლისა და აჭარის საზოგადოებრივი მაუწყებლის ეთერში გაიმართება

კონსტიტუციური კანონის პროექტის საყოველთაო-სახალხო განხილვის საორგანიზაციო კომისიამ, რომელსაც პარლამენტის თავმჯდომარე, არჩილ თალაკვაძე ხელმძღვანელობს, სხდომა გამართა.

კომისიის წევრებმა სატელევიზიო განხილვების ფორმატზე იმსჯელეს. კონსტიტუციური კანონის პროექტის განხილვის სატელევიზიო ფორმატში ჩატარების გადაწყვეტილება კომისიამ პირველ სხდომაზე, კოვიდ-19-ის გავრცელებასთან დაკავშირებული რისკების გამო მიიღო.

კომისიის სხდომაზე შეთანხმდნენ, სატელევიზიო ფორმატში ორი განხილვა შედგება, რომელსაც პარლამენტის თავმჯდომარე გაუძღვება და რომელსაც საზოგადოებრივი მაუწყებელი და აჭარის საზოგადოებრივი მაუწყებელი უმასპინძლებს.

ინტერაქციული კომუნიკაციის რეჟიმში, კომისიის წევრები საზოგადოებისგან შეკითხვებსაც მიიღებენ და უპასუხებენ.

როგორც სხდომის დასრულების შემდეგ, საქართველოს პარლამენტის წევრმა, ირაკლი კობახიძემ განაცხადა, საყოველთაო-სახალხო განხილვები, სავარაუდოდ, ივნისის შუა რიცხვებში დასრულდება, რაც დეპუტატებს კანონპროექტის პირველი მოსმენით განხილვის საშუალებას 21 ივნისისთვის მისცემს.

ირაკლი კობახიძე ვარაუდობს, რომ კანონპროექტის სამი მოსმენით განხილვა არლამენტში 29 ივნისს დასრულდება.