საზოგადოება

კორონავირუსის ოთხი ძირითადი ნიშანი, როცა სასწრაფოდ უნდა მიმართოთ ექიმს

კორონავირუსით ავადმყოფობისას ოთხი ძირითადი ნიშანია, როდესაც თქვენ სასწრაფოდ უნდა მიმართოთ ექიმს ან სასწრაფო სამედიცინო დახმარება გამოიძახოთ, - ამის შესახებ ჯონ ჰოპკინსის უნივერსიტეტის ქართველმა ექიმმა, ინფექციონისტმა მამუკა მაჩაიძემ განაცხადა.

„ოთხი ძირითადი კარდინალური ნიშანი, რა დროსაც თქვენ სასწრაფოდ უნდა მიმართოთ ექიმს. ეს არის სუნთქვის გაძნელება, ზეწოლის შეგრძნება გულმკერდის არეში, კონფუზია, ანუ გონების დაბინდვა ან ძლიერი ძილიანობა, რა დროსაც სხვისი დახმარების გარეშე თქვენ თავად გაღვიძება არ შეგიძლიათ. ასევე, აღინიშნება ტუჩების, სახის ან კიდურების გალურჯება. თუ ამ ოთხი კარდინალური ნიშნიდან ერთ-ერთი გაქვთ, ეს ნიშნავს, რომ შედარებით მძიმე დაავადებასთან გაქვთ საქმე და ფრთხილად უნა იყოთ. თუ შეძლებთ, სწრაფად დაუკავშირდით ექიმს ან გადაუდებელ დახმარებას მიმართეთ“, - განაცხადა მაჩაიძემ.
ინფექციონისტმა ასევე ისაუბრა, თუ რა დროშია მოსალოდნელი გართულებები და პაციენტის მდგომარეობის დამძიმება.

„დაავადების სიმპტომების გამოჩენიდან მე-5 მე-7 დღეს იწყება პაციენტის მდგომარეობის დამძიმება. თუმცა მოსალოდნელია მე-10 მე-14 დღემდეც. ამ შემთხვევაშიც უნდა ვიყოთ ფრთხილად. მდგომარეობის დამძიმებაზე როდესაც ვსაუბრობთ, ეს წუთებში არ მოხდება. ჰოსპიტალში ვინც ხვდება, მათ დღეების განმავლობაში აქვთ ჩივილები. ყურადღება არ მიაქციეს, ან გადაწყვიტა, რომ ექიმისთვის არ მიემართა და ამ სიმპტომებით ცხოვრებას აგრძელებდა. როგორც წესი პაციენტის დამძიმება არ ხდება ასე 10 წუთში ან რამდენიმე საათში“, - განაცხადა მამუკა მაჩაიძემ.