პოლიტიკა

ყველა გვილოცავს მიშას წარმატებულ დაბრუნებას უკრაინაში - სანდრა რულოვსი საქართველოში ჩამოვიდა

საქართველოს ყოფილი პირველი ლედი სანდრა რულოვსი საქართველოში დაბრუნდა თავის შვილ ნიკოლოზ სააკაშვილთან ერთად. ამის შესახებ რულოვსმა ფეისბუკის საკუთარ გვერდზე დაწერა.

რულოვსის ინფორმაციით, მან უკრაინა ბორისპოლის აეროპორტიდან დატოვა, რასაც პასპორტის ბეჭდები ადასტურებს.

„უკრაინიდან ჩვენ დავბრუნდით საქართველოში, ნიკოლოზი სკოლაშია და მე სამსახურში. ყველა გვილოცავს მიშას უკრაინაში წარმატებულ დაბრუნებას და როგორც ჩანს, ყველა საკმაოდ ღელავდა და დღესაც ღელავს მის გამო!

ნიკოლოზი და მე ვამაყობთ, რომ მიშასთან ერთად ვიყავით მთელი ამ პროცესის განმავლობაში, გარდა იმ საკმაოდ დაძაბულ მომენტისა, როცა საზღვარი გადაიკეთა. ჩვენ რამდენიმე საათის შემდეგ, ტრანსპორტის საშუალებით და მშვიდ ვითარებაში შევედით უკრაინაში შეგინის საზღვრიდან და გუშინ საღამოს ბორისპოლის აეროპორტიდან გამოვედით, რასაც ადასტურებს ბეჭდები ჩვენს პასპორტებში“, - წერია რულოვსის ფეისბუკპოსტში.

შეგახსენებთ, 10 სექტემბერს 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა. ის ახლა ლვოვში იმყოფება.

აღნიშნულ ფაქტზე სისხლის სამართლის საქმეა აღძრული უკრაინის სსკ-ის 332-ე მუხლით, რაც სახელმწიფო საზღვარზე პირების უკანონოდ გადაყვანას გულისხმობს, ასევე ადგილობრივი შსს-ის ინფორმაციით, ინციდენტი „სისხლის სამართლის კოდექსის“ 348-ე მუხლის დანაშაულის ნიშნებსაც შეიცავს.

ანა მებურიშვილი