პოლიტიკა

ყველა გზას მივმართავთ, რომ ე.წ. ფარული მოსმენების კანონი არ ამოქმედდეს - რომან გოცირიძე

დღეს პარლამენტში ე.წ. ფარული მოსმენების შესახებ რიგგარეშე სხდომა მიმდინარეობს. საპარლამენტო ფრაქცია „ერთიანი ნაციონალური მოძრაობის“ წევრის რომან გოცირიძის თქმით, პარტია შეეცდება, რომ უმრავლესობის მიერ ინიცირებული კანონი არ ამოქმედდეს.

„სამი ძირითადი ამოცანა უნდა გადაეწყვიტა ამ კანონს. პირველი, რომ ის უნდა ყოფილიყო დამოუკიდებელი, მეორე, უხეშად არ უნდა შეხებოდა ბიზნესს, მესამე, უნდა ყოფილიყო ძლიერი კონტროლი ახლად შექმნილი სააგენტოსადმი. არცერთი მოთხოვნა არ იქნა დაკმაყოფილებული. ეს არის ანტიკონსტიტუციური კანონი და დიდი ალბათობით , საკონსტიტუციო სასამართლო ამ კანონს კვლავ უკან დააბრუნებს. ჩვენ ვიხმართ ყველა გზას, რომ ეს კანონი არ შევიდეს მოქმედებაში“, - განაცხადა გოცირიძემ რიგგარეშე სხდომის დაწყების წინ.

რიგგარეშე სხდომაზე საკანონმდებლო ცვლილებათა პაკეტის ტექნიკურ მხარეს განიხილავენ. როგორც ცნობილია, კანონის მესამე მოსმენით განხილვას პროტესტის ნიშნად არ დაესწრებიან საპარლამენტო ფრაქცია „ევროპული საქართველოს“ წევრები.

შეგახსენებთ, რომ აღნიშნულ კანონპროექტზე მუშაობა მას შემდეგ გახდა საჭირო, რაც 2016 წლის 14 აპრილს საკონსტიტუციო სასამართლომ ფარული მოსმენების არსებული წესი არაკონსტიტუციურად ცნო. სასამართლომ პარლამენტს დააკისრა ცვლილებების შეტანის ვალდებულება 2017 წლის 31 მარტამდე.

ანა მებურიშვილი