კომენტარი
ყველას ვალია გავიხსენოთ ის ადამიანები, ვინც იბრძოდა, რათა მტერი ქალაქში არ შემოსულიყო - დავით ნარმანია
თბილისის მერის დავით ნარმანიას განცხადებით, ყველას ვალია გავიხსენოთ ის ადამიანები, ვინც იბრძოდა, რათა მტერი ქალაქში არ შემოსულიყო.
ამის შესახებ ნარმანიამ ჟურნალისტებს კოჯრის მისადგომებთან განუცხადა, სადაც საქართველოს დამოუკიდებლობისთვის მებრძოლ იუნკერთა მემორიალს პატივი მიაგო.
“დღევანდელი დღე არის იმ ღირსეული ადამიანების მოგონების დღე, რომლებმაც თავი შესწირეს იმ ყველაფერს, რასაც ჩვენი ქვეყნისა და ქალაქის შემდგომი განვითარება, თავისუფლება ჰქვია. ისინი იბრძოდნენ იმისთვის, რომ მტერი ქალაქში არ შემოსულიყო, მტრისგან დაეცვათ ჩვენი ქვეყანა. ამიტომ თითოეული ჩვენგანის ვალია, რომ გავიხსენოთ ეს ღირსეული ადამიანები, ამოვიდეთ ამ ადგილას, სადაც ისინი იბრძოდნენ და მათ ხსოვნას პატივი მივაგოთ”, - განაცხადა დავით ნარმანიამ.
1921 წლის 25 თებერვალს, რუსეთის მე-11 არმიამ თბილისი აიღო და საქართველოს ანექსია მოახდინა. საქართველოს დამოუკიდებლობისთვის მებრძოლ იუნკერთა დიდი ნაწილი ბრძოლის ველზე გმირულად დაიღუპა.
საქართველოს პარლამენტის 2010 წლის 21 ივლისის დადგენილების თანახმად, ყოველი წლის 25 თებერვალი საბჭოთა ოკუპაციის დღედ არის გამოცხადებული.
მონიკა დავლიანიძე