მოზაიკა

“La Gazzetta Dello Sport” უკვე ქართულ მედიასივრცეშია

მსოფლიოს ერთ-ერთი უძველესი და ისტორიული იტალიური სპორტული მედიაპლატფორმა „La Gazzetta Dello Sport“ უკვე საქართველოშია. მისი ქართული ვერსიის - „La Gazzetto Dello Sport Georgia“-ს ოფიციალური წარდგინება თბილისში გაიმართა. იტალიური გაზეთის ექსკლუზიური ფრანშიზის მფლობელი ევრაზიის ქვეყნებსა და საქართველოში კომპანია “SMH Sports“ გახდა.

პრეზენტაციას საქართველოში საგანგებოდ მოწვეული ლეგენდარული იტალიელი ვეტერანი ფეხბურთელი, 2006 წლის მსოფლიოს ჩემპიონი ჯანლუკა ძამბროტა, მისივე თანამემამულე, ამავე წლის მსოფლიოს ჩემპიონი კრისტიან ძაკარდო და „La Gazzetto Dello Sport-ის“ დირექტორი ჯანლუკა ვარანო დაესწრნენ. ამ უკანასკნელის თქმით, ახალი გამოცემა მკითხველებს ექსკლუზიურ ამბებსა და მოვლენების სიღრმისეულ ანალიზს შესთავაზებს.

SMH Sports-ის დამფუძნებლის, ლაშა მაჭავარიანის განცხადებით, ხსენებული მედიასაშუალება ქართული სპორტის პოპულარიზაციას მოემსახურება.

შეხვედრაზე თბილისის მერი, საქართველოს ნაკრების ყოფილი კაპიტანი კახა კალაძეც იმყოფებოდა. როგორც მან აღნიშნა, გამოცემა ქართველი და იტალიელი გულშემატკივრების ერთმანეთთან დაახლოებას შეუწყობს ხელს.

„მზად ვართ, ყველანაირად დაგიდგეთ მხარში“, - დაჰპირდა გამოცემის მესვეურებს კახა კალაძე.

ჯანლუკა ძამბროტას შეფასებით, ქართველები საუკეთესო ხალხია. საფეხბურთო კლუბ „ნაპოლის“ შემტევი ხვიჩა კვარაცხელია კი იტალიაში ყველასათვის საყვარელი ადამიანია.

„“La Gazzetta Dello Sport-ის“ საქართველოში შემოსვლა მნიშვნელოვანი მოვლენაა. ეს ორმხრივ ურთიერთობებს კიდევ უფრო გააუმჯობესებს, რაც ფეხბურთის განვითარებისათვის სერიოზული წინსვლის საწინდარია. საქართველოსა და იტალიას შორის დიდ მსგავსებას ვხედავ. თქვენც ჩვენსავით ხალისიანები, კომუნიკაბელურები, სტუმართმოყვარეები ხართ. კარგი სამზარეულო გაქვთ. ეს ყველაფერი კი ჩემს იტალიას მაგონებს. ქართველები და იტალიელები ბიძაშვილებივით ვგავართ ერთმანეთს“, - განაცხადა ჯანლუკა ძამბროტამ.

როგორც ღონისძიებაზე ითქვა, SMH Sports-ის გადაწყვეტილებით, შემდეგი ქვეყანა, სადაც აღნიშნულ სპორტულ ბრენდს ოფიციალურად წარადგენენ, უკრაინა იქნება.

მიმდინარე წელს კი საქართველოში კიდევ ერთი საერთაშორისო მედიასაშუალების შემოყვანა იგეგმება.