მოზაიკა

ლეგენდარული რიშარ გალიანო თბილისში კონცერტს გამართავს

დღეს, 23 მაისს თბილისში, შოთა რუსთაველის ეროვნულ თეატრში ფრანგი აკორდეონისტის, რიშარ გალიანოს სოლო კონცერტი გაიმართება. მისი სახელწოდებაა „Passion Galliano”. ღონისძიების ორგანიზატორია კომპანია „Dec&Art Events”.

როგორც სასტუმრო „თბილისი მერიოტში“ გამართულ პრესკონფერენციაზე გალიანოს წარმომადგენელმა ანი ლაღიძემ განაცხადა, მსოფლიოში ნომერ პირველ აკორდეონისტად აღიარებული, იტალიური წარმოშობის, ფრანგი მუსიკოსი საქართველოს მეშვიდედ სტუმრობს. 2006 წლიდან დღემდე მას თბილისის პრესტიჟული საკონცერტო თეატრების სცენებზე 6 სრულანშლაგიანი კონცერტი აქვს ჩატარებული.

„ამჯერად კი იგი პირველად შეასრულებს ქართველი კომპოზიტორის, ნატალია თოთიბაძის მელოდიას -- „ტანგო ერთისათვის“. ქართველი მსმენელი ბატონ რიშარს კარგად იცნობს. ფრანგულ კულტურას საქართველოში გამორჩეულად სწორედ ეს ბრწყინვალე მუსიკოსი წარმოადგენს“, -- აღნიშნა ანი ლაღიძემ.

თავად სტუმრის თქმით, საქართველოში მისი ყოფნა ყოველთვის ამაღელვებელია.

„ქართველ ხალხს არაჩვეულებრივი დახვედრისათვის დიდ მადლობას ვუხდი და ჩემს მადლიერებას განსაკუთრებულ შესრულებაში გამოვხატავ. დიდი მნიშვნელობა ექნება მსმენელისაგან წამოსულ მუხტს, რის შედეგადაც ახალი ისტორია დაიწერება. ვფიქრობ, ნატალია თოთიბაძის კომპოზიცია „ტანგო ერთისათვის“ ჩემს სოლო პროგრამაში შევიტანო “, -- განაცხადა რიშარ გალიანომ.

მან ჟურნალისტებთან საუბრისას აღნიშნა, რომ აკორდეონი 60 წლის წინ ბებიამ აჩუქა და ეს ინსტრუმენტი მისთვის განსაკუთრებულია.

კონცერტზე „ტანგო ერთისათვის“ სიმფონიურ ორკესტრთან ერთად შესრულდება, რომელსაც დირიჟორი კახი სოლომნიშვილი უდირიჟორებს.

რიშარ გალიანო აკორდეონის მუსიკას უკვე 50 წლის მანძილზე უწევს პოპულარიზაციას. მან თავის შემოქმედებაში კლასიკური და ეთნიკური მუსიკა ერთმანეთს საუცხოოდ დაუკავშირა.