პოლიტიკა
ლევან ხაბეიშვილი ვახტანგ შაქარიშვილის დაჯარიმებას მოითხოვს
თბილისის საკრებულოს ფრაქცია „ნაციონალური მოძრაობის“ წევრი, ლევან ხაბეიშვილი საჯარო სამსახურის ეროვნულ ბიუროს საჩივრით მიმართავს და საკრებულოს ფრაქცია „ქართული ოცნების“ დეპუტატ ვახტანგ შაქარიშვილთან დაკავშირებით საქმის შესწავლას მოითხოვს.
როგორც ლევან ხაბეიშვილმა ჟურნალისტებს განუცხადა, მან უწყებაში ის დოკუმენტი წარადგინა, რომლის მიხედვით, შაქარიშვილის მეუღლის კომპანია „რეკ-დ“-ის თბილისის მერია ხელშეკრულებებს ტენდერის გარეშე, პირდაპირ უფორმებს.
მისი თქმით, დოკუმენტების მიხედვით, ჯამში კომპანიისთვის 200 ათას ლარზე მეტია გადარიცხული.
ლევან ხაბეიშვილის განცხადებით, საჭიროა „ქართული ოცნების“ დეპუტატის ქმედებით დაინტერესდეს ასევე მთავარი პროკურატურაც.
„ის, რომ „ქართული ოცნების“ დეპუტატს აფინანსებდნენ თბილისის ბიუჯეტიდან, დასტურდება დოკუმენტაციით; შემოსული თანხები მას არ ჰქონდა ასახული დეკლარაციაში და ეს დასტურდება კონკრეტული დოკუმენტაციით; ის, რომ ყველაზე აგრესიულ დეპუტატს ჩვენი მოქალაქეების სახსრებიდან ურიცხავენ ასიათასობით ლარს, ესეც დასტურდება დოკუმენტაციით. არაფერი დარჩენია საჯარო სამსახურის ბიუროს გარდა იმისა, რომ ეს საქმე კანონის შესაბამისად ბოლომდე მიიყვანოს. კონკრეტული ადამიანის, ამ შემთხვევაში, ვახტან შაქარიშვილის დაჯარიმება მოხდეს კანონის შესაბამისად“, – განაცხადა ხაბეიშვილმა.
აღნიშნულთან დაკავშირებით გამოძიების დაწყების მოთხოვნით ხაბეიშვილი პროკურატურასაც მიმართავს.
„მნიშვნელოვანია პროკურატურამ გამოიძიოს როგორ და რისთვის მისცეს ვახტანგ შაქარაშვილის მეუღლეს ბიუჯეტიდან ტენდერის გარეშე 200 ათას ლარზე მეტი. ეს არის საახალწლო ღონისძიებებისთვის ერთჯერადად გამოყოფილი თანხა.