პოლიტიკა
ლევან ხაბეიშვილის მიერ საკრებულოს სხდომის დატოვებას სიტყვიერი შელაპარაკება მოჰყვა
თბილისის საკრებულოს ფრაქცია „ნაციონალური მოძრაობის“ წევრმა, ლევან ხაბეიშვილმა პროტესტის ნიშნად დატოვა საკრებულოს გარემოს დაცვისა და ურბანული დაგეგმარების გაერთიანებული კომისიების სხდომა, სადაც მიწის ნაკვეთების ზონალური ცვლილებები განიხილებოდა. საკრებულოს უმრავლესობის წევრმა ირაკლი ზარქუამ ხაბეიშვილი შოუს მოწყობაში დაადანაშაულა, რასაც სიტყვიერი დაპირისპირება მოჰყვა.
ხაბეიშვილის განმარტებით, ის არცერთი კომისიის სხდომას არ დაესწრება, სანამ არ იქნება მიღებული თბილისის გენერალური გეგმა.
„მარტივი მიზეზით, სანამ არ იქნება გენერალური გეგმა მიღებული, მანამ გარკვეული პოლიტიკური ჯგუფები დედაქალაქში არ უნდა წყვეტდნენ, სად, რა კოეფიციენტი უნდა მოიმატოს, სად უნდა გაუქმდეს რეკრეაციული ზონა. სადაც დღის წესრიგში ასეთი საკითხები იქნება, სადაც განიხილავენ, მათ შორის ზონალურ ცვლილებებს, მე პროტესტის ნიშნად, არცერთ კომისიის სხდომას არ დავესწრები“, – განაცხადა ხაბეიშვილიმა.
მან აღნიშნა, რომ გენგეგმის მიღება სტრატეგიულად მნიშვნელოვანია.
ხაბეიშვილის რეაქციას გამოეხმაურა ურბანული დაგეგმარების კომისიის თავმჯდომარე რევაზ სოხაძე. მისი თქმით, აღნიშნული დოკუმენტი არ არეგულირებს იმ საკითხებს, რასაც ოპოზიციონერი დეპუტატი აპროტესტებს.
თბილისის მიწათსარგებლობის გენერალური გეგმის საჯარო განხილვა გუშინ გაიმართა, რომელსაც არასამთავრობო ორგანიზაციების, პოლიტიკური პარტიების წარმომადგენლები, ასევე, მერობის ყოფილი კანდიდატები, დარგის სპეციალისტები და ურბანისტები ესწრებოდნენ. თბილისის მერიამ გეგმასთან დაკავშირებით საკუთარი შენიშვნები წარადგინა. თბილისის მერის მოადგილის, ილია ელოშვილის განცხადებით, მიწათსარგებლობის გენერალური გეგმა არ შეიძლება განახლებულად ჩაითვალოს, რადგან მისი შემუშავებისას არ ყოფილა გათვალისწინებული რიგი საკითხები, მათ შორის კერძო საკუთრების ცნება.