კომენტარი
ლევან ყიფიანს ჩემთან აქვს მონაყოლი, თუ როგორ მივიდა, სცემეს, შეურაცხყოფა მიაყენეს, ფარცხალაძეს ადანაშაულებდა - გიორგი ქურდაძე
„ომეგა 2“-ის დირექტორმა გიორგი ქურდაძემ სპორტისა და ახალგაზრდობის ყოფილი მინისტრის, ლევან ყიფიანის ცემის ფაქტი დაადასტურა. როგორც ქურდაძემ გადაცემაში „360 გრადუსი“ განაცხადა, მან პირადად ნახა ნაცემი ყიფიანი და მისგან მოისმინა, რომ ფიზიკური ანგარიშსწორება ფარცხალაძემ განახორციელა.
ქურდაძემ აღნიშნა, რომ ყიფიანის ცემა 4 მილიონი ლარის მიტანის დაგვიანებას უკავშირდებოდა, ვინაიდან „ომეგას“ ხელმძღვანელობას თავიდან ამ თანხის გადახდა არ სურდა.
მისივე განცხადებით, ამის შემდეგ ყიფიანმა დაიწყო ზეწოლა, რომ მათ იმაზე უარესს უზამდნენ, თუ თანხას არ გამოიტანდნენ. ქურდაძის ინფორმაციით, აღნიშნული თანხა ბიძინა ივანიშვილთან უნდა მიეტანათ.
„ლევან ყიფიანი ახდენდა ჩვენზე ზეწოლას, გვაშანტაჟებდა, რომ ის ფული აუცილებლად უნდა მიგვეტანა, რადგან ჩვენი უსაფრთხოება არ იქნებოდა დაცული - თუ ეს არ იქნება, დაგემართებათ იმაზე უარესიო, რაც მე დამემართაო. ფიზიკური შეურაცხყოფა - როგორც თვითონ ამბობდა. პირადად ჩემთან აქვს მონაყოლი, ნათქვამი, ყველაფერი დეტალებში. ყვებოდა, თუ როგორ მივიდა, სცემეს, შეურაცხყოფა მიაყენეს. იმ საღამოსაც იყო მოსული, პირადად დავინახე, რომ ის მართლა ნაცემი იყო. შუბლზე ჰქონდა დიდი წითელი ზოლი და სახეზეც ეტყობოდა ნაცემი რომ იყო. ის ოთარ ფარცხალაძეს ადანაშაულებდა. როგორც ჩანს, ფული არ მიჰქონდა თავის დროზე და მალე უნდა მიეტანა. ის ამბობდა, რომ ეს ფული უნდა მისულიყო ბიძინა ივანიშვილთან, ეს იყო მისი სიტყვები და არა ჩემი“, - განაცხადა ქურდაძემ.