კომენტარი

ლევან ვასაძის არაკორექტულ და არაეთიკურ განცხადებებზე კომენტარს ვერ გავაკეთებ - ნინო ლომჯარია

სახალხო დამცველი ნინო ლომჯარია ბიზნესმენ ლევან ვასაძის განცხადებებზე კომენტარისგან თავს იკავებს და აცხადებს, რომ ვასაძესთან კითხვები სამართალდამცავ ორგანოებს უნდა ჰქონდეთ.

„ლევან ვასაძის არაკორექტულ და არაეთიკურ განცხადებებზე კომენტარს ვერ გავაკეთებ. ვფიქრობ, მასთან შეკითხვები სამართალდამცავ ორგანოებს უნდა ჰქონდეს, რადგან რამდენიმე დღის წინ სწორედ მისგან მოვისმინეთ სახელმწიფო წესრიგისთვის და უსაფრთხოებისთვის საფრთხის შემცველი განცხადებები, რომელიც ნამდვილად წარმოადგენს გამოძიების დაწყების საფუძველს და სერიოზული დანაშაულის ნიშნებს შეიცავს. ამიტომ, ჩემი რჩევა იქნება, რომ მის მიმართ შეკითხვები დასვას და ამ საკითხებზე იმუშაონ სამართალდამცავმა ორგანოებმა. ეს სახალხო დამცველის კომპეტენცია არ არის, ეს სამართალდამცავი უწყებების კომპეტენციაა ამ ტიპის ადამიანებთან და დაჯგუფებებთან ურთიერთობა“, – განაცხადა ნინო ლომჯარიამ.

ბიზნესმენმა ლევან ვასაძემ დღეს განცხადება გააკეთა ელჩების მისამართით და მოუწოდა მათ თავი დაანებონ საქართველოს.

„ჩვენო ძვირფასო მეორეხარისხოვანი ევროპის ელჩებო, რომლებიც ასრულებთ თქვენი ამერიკელი პატრონების დავალებას - დაგვანებეთ თავი იმიტომ, რომ გენგრევათ თავზე ევროპა. წადით და მიხედეთ მას. ჩემმა მტერმა იარა თქვენი გზით, რომლითაც თქვენ დადიხართ ბოლო 30-40 წელია. როდესაც დაუბრუნდებით ნამდვილ ევროპულ ღირებულებებს, რომლებიც არის პეტრესი და პავლესი, რომლებმაც შექმნეს ის ევროპა, მაშინ შეგვეხმიანეთ“, - განაცხადა ვასაძემ.