სამართალი

ლევან ღირსიაშვილი და ნიკოლოზ ქავთარაძე აშშ-ში ვიზიტით იმყოფებოდნენ

მიმდინარე წლის 18 - 22 ივლისს სახელმწიფო უსაფრთხოებისა და კრიზისების მართვის საბჭოს მდივნის მოადგილე ლევან ღირსიაშვილი და საბჭოს აპარატის თავდაცვის საკითხთა დეპარტამენტის დირექტორი ნიკოლოზ ქავთარაძე ვიზიტით იმყოფებოდნენ ამერიკის შეერთებული შტატების ქალაქ ვაშინგტონში.

ვიზიტის ფარგლებში, შეხვედრები ჩატარდა ამერიკის შეერთებული შტატების ეროვნული უსაფრთხოების საბჭოს, თავდაცვის დეპარტამენტის, სახელმწიფო დეპარტამენტის, საგანგებო სიტუაციების მართვის ფედერალური სააგენტოს, თავდაცვის ინსტიტუციური აღმშენებლობის პროგრამის მაღალი რანგის წარმომადგენლებთან.

შეხვედრების ძირითადი მიზანი იყო საბჭოს აპარატის სტრუქტურის, ფუნქცია-მოვალეობების და კრიზისული სიტუაციების მართვის სისტემის გაცნობა, ასევე პარტნიორი ქვეყნის უწყებების გამოცდილების გაზიარება და სამომავლო თანამშრომლობის გაღრმავება.

სამუშაო შეხვედრა გაიმართა სახელმწიფო დეპარტამენტის მომზადებისა და წვრთნების ცენტრში, სადაც მხარეებმა ერთმანეთს გაუზიარეს კრიზისული სიტუაციებისთვის მზადყოფნის მოსამზადებელი სწავლების გამოცდილება.

ვიზიტის ფარგლებში, ასევე, სახელმწიფო უსაფრთხოებისა და კრიზისების მართვის საბჭოს მდივნის მოადგილემ, თავდაცვისა და უსაფრთხოების სამუშაო ჯგუფის აშშ-საქართველოს თანამშრომლობის ქარტიის ფარგლებში გამართული ყოველწლიურ შეხვედრაზე წარადგინა სახელმწიფო უსაფრთხოებისა და კრიზისების მართვის საბჭოში უკანასკნელ პერიოდში განხორციელებული პროექტების და უსაფრთხოების პოლიტიკის დაგეგმვის სფეროში გატარებული ღონისძიებების შესახებ ინფორმაცია.