პოლიტიკა

ლინას ლინკევიჩუსი არჩილ ტატუნაშვილის გარდაცვალების საკითხის ევროკავშირში განხილვას მოითხოვს

ლიტვა არჩილ ტატუნაშვილის გარდაცვალების საკითხის ევროკავშირში განხილვას მოითხოვს.

შესაბამისი განცხადება ლიტვის საგარეო საქმეთა მინისტრმა, ლინას ლინკევიჩუსმა სოციალურ ქსელ „ტვიტერში“ დაწერა.

„რეპრესიული რეჟიმის მახინჯი სახე რუსეთის მიერ ოკუპირებულ სამხრეთ ოსეთში. ვგმობ საქართველოს მოქალაქეთა დევნა და ვითხოვ, ადგილზე შეიქმნას ადამიანის უფლებათა დაცვისა და უსაფრთხოების საერთაშორისო მექანიზმი“, – წერს ლინკევიჩუსი.

მისი თქმით, საკითხს ევროკავშირის საგარეო ურთიერთობათა საბჭოს დღევანდელ სხდომაზე დასვამს.

ცნობისათვის, საქართველოს სახელმწიფო უსაფრთხოების სამსახურის ინფორმაციით, 22 თებერვალს ოკუპირებული ცხინვალის წარმომადგენლებმა საქართველოს მოქალაქეები არჩილ ტატუნაშვილი,ლევან ქუტაშვილი და იოსებ პავლიაშვილი უკანონოდ დააკავეს. გავრცელებული ინფორმაციით, არჩილ ტატუნაშვილი 23 თებერვალს ოკუპირებულ ქალაქ ცხინვალის საავადმყოფოში გარდაიცვალა.

რაც შეეხება ლევან ქუტაშვილს და იოსებ პავლიაშვილს, ისინი ცხინვალის ე.წ. ციხიდან გაათავისუფლეს, თუმცა კვლავ ოკუპირებულ ტერიტორიაზე რჩებიან.

ნინო ექვთიმიშვილი