საზოგადოება

ლონდონის მერიაში 835 ადამიანი მუშაობს, თბილისის მერიაში კი 5 700 – „ახალი საქართველო“

პარტია „ახალმა საქართველომ“ ევროპის სხვადასხვა დედაქალაქის მერიაში წერილი გაგზავნა, რომლითაც ინტერესდება, თუ რამდენი ადამიანია ჰყავთ დასაქმებული.

როგორც „ახალ თაობასთან“ საუბარში პარტიის ერთ-ერთმა ლიდერმა ლევან ხაბეიშვილმა განაცხადა, რამდენიმე დღის წინ პარტიამ პასუხი ლონდონის მერიიდან მიიღო. ირკვევა, რომ ლონდონის მერიაში 835 ადამიანია დასაქმებული, მაშინ როდესაც თბილისის მერიაში ეს რიცხვი 5700 დასაქმებულს აღწევს.

„გაირკვა, რომ ლონდონის მერიაში 835 ადამიანი მუშაობს, თბილისის მერიაში კი 5 700 კაცი. ლონდონში 8 278 251 ადამიანი ცხოვრობს, თბილისში - 1 108 717. ფართობით ლონდონი თბილისზე მინიმუმ 2-ჯერ დიდია“,-განაცხადა ხაბეიშვილმა და დასძინა, რომ უახლოეს პერიოდში პასუხებს ამსტერდამიდან, რომიდან, ბერლინიდან და დელიდან ელოდება.

ამასთან, დაზუსტებისთვის პარტიის წევრი ამბობს, რომ 5 700 ადამიანი მხოლოდ მერიაში არ არის დასაქმებული, თუმცა, ამის მიუხედავად, უშუალოდ მერიაში დასაქმებული ადამიანების რაოდენობა, ლონდონის მერიისას მნიშვნელოვნად აღემატება.

„ეს 5 700 ადამიანი გამგეობებში, სსიპებსა და აიპებშია დასაქმებული. უშუალოდ დედაქალაქის მერიასა და მის საქალაქო სამსახურში 1 200-ზე მეტი ადამიანია დასაქმებული. ლონდონთან შედარებით მაინც სერიოზული უპირატესობა გვაქვს“,-აღნიშნა პოლიტიკოსმა.

გარდა ამისა, მისი თქმით, პარტიამ სხვადასხვა ქვეყნის სამთავრობო სტრუქტურებშიც აქვს გაგზავნილი შესაბამისი შინაარსის წერილი.

„საქართველოს სპორტის სამინისტროში გაცილებით მეტი ადამიანია დასაქმებული, ვიდრე მანჩესტერ იუნაითედის ადმინისტრაციაში. არადა, მანჩესტერ იუნაითედის ბიუჯეტი სპორტის სამინისტროს ბიუჯეტზე ასეულობით მილიონით მეტია. რაც მეტია ბიუჯეტი, მით მეტი ხალხი სჭირდება მის ადმინისტრირებას“,-განმარტავს ლევან ხაბეიშვილი.

მონიკა დავლიანიძე