მსოფლიო

ლვოვის სასამართლოში მიხეილ სააკაშვილის სასამართლო განხილვა 22 სექტემბრისთვის გადაიდო

საქართველოს ყოფილი პრეზიდენტისა დ ოდესის ექს-გუბერნატორის, მიხეილ სააკაშვილის სასამართლო განხილვა სახელმწიფო საზღვრის უკანონოდ გადაკვეთის საქმეზე ლვოვის სასამართლომ 22 სექტემებრისთვის გადადო. ამის შესახებ Zaxid.net-ი იუწყება.

სააკაშვილის საქმეზე სასამართლო სხდომა გუშინ გაიმართა. ოდესის ყოფილი გუბერნატორის ადვოკატის მტკიცებით, სააკაშვილის მიერ 12 სექტემბერს ხელმოწერილი ადმინისტრაციული სამართალდარღვევათა პროტოკოლი საზღვრის უკანონოდ გადაკვეთის შესახებ არასწორად იყო შედგენილი. დაცვამ ასევე მოითხოვა „შეგინის“ სასაზღვრო-გამშვები პუნქტიდან მგზავრთა საევაკუაციო გეგმის წარდგენა, რადგან 10 სექტემბრის აქციაზე გავრცელდა ინფორმაცია, რომ ტერიტორია დანაღმული იყო.

სააგენტოს ინფორმაციით, კანონდარღვევის დადასტურების შემთხვევაში „ახალი ძალების მოძრაობის“ ლიდერს 8 000 გრივნამდე ჯარიმა დაეკისრება.

შეგახსენებთ, 10 სექტემბერს 20 საათზე ოდესის ყოფილი გუბერნატორი თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა.

12 სექტემბერს ლვოვში, სასტუმრო ლეოპოლისის წინ სააკაშვილმა ხელი მოაწერა ადმინისტრაციული სამართალდარღვევათა პროტოკოლს უკრაინის საზღვრის უკანონოდ გადაკვეთის შესახებ.

გამოძიება სააკაშვილის საქმეზე 5 მუხლითაა აღძრული, მათ შორის ხულიგნობაზეც.

ანა მებურიშვილი