საზოგადოება

მაჭარაშვილის მოტივი გამოკვეთილი არ არის - ფარმაცევტული საქმიანობის დეპარტამენტის დაკავებული უფროსის ადვოკატი

დღეს გავრცელებული ინფორმაციით, საქართველოს ფინანსთა სამინისტროს საგამოძიებო სამსახურმა სამსახურებრივი უფლებამოსილებების ბოროტად გამოყენების გამო სსიპ „სამედიცინო საქმიანობის სახელმწიფო რეგულირების სააგენტოს“ ფარმაცევტული საქმიანობის დეპარტამენტის უფროსი, დავით მაჭარაშვილი დააკავა.

მისი ადვოკატის, სოსო ბარათაშვილის თქმით, დაპატიმრების პროცედურა დარღვევებით ჩატარდა.

გარდა ამისა, ბარათაშვილი აცხადებს, რომ მაჭარაშვილის წინასწარ პატიმრობაში ყოფნა აუცილებლობას არ წარმოადგენს.

„მიმაჩნია, რომ ბრალდების ამდაგვარი ფორმულირება არასწორია, პირველ რიგში, რომ წამქეზებლად მოგვევლინნენ კომპანიების თანამშრომლები, თითქოს ბატონი მაჭარაშვილის მოტივი გამოკვეთილი არ არის . მეორე მხრივ, ვფიქრობ, რომ არასწორად, მისთვის დაუსაბუთებლად მოხდა წინასწარი პატიმრობის შეფარდება, ვინაიდან ბრალდების მხარე აცხადებს, თითქოს მას შეუძლია, ხელი შეუშალოს გამოძიებას, შეუძლია, ჩაიდინოს ახალი სახის დანაშაული, რაც საფუძველსაა მოკლებული“- განაცხადა ბარათაშვილმა „ქრონიკასთან“ საუბრისას.

შეგახსენებთ, რომ საქართველოს ფინანსთა სამინისტროს საგამოძიებო სამსახურის ინფორმაციით, დავით მაჭარაშვილი სამსახურებრივი უფლებამოსილებების ბოროტად გამოყენების გამო დააკავეს. გარდა ამისა სისხლის სამართლის პასუხისგებაში არის მიცემული ფსიქოტროპული მედიკამენტების იმპორტიორი ორი კომპანიის ხელმძღვანელი პირი.

როგორც გამოძიებამ გაარკვია, მაჭარაშვილმა ფსიქოტროპული და მასთან გათანაბრებული მედიკამენტების კვოტირებისა და მედიკამენტების იმპორტის რაოდენობის დადგენის პროცესში, აღნიშნულ ორ კომპანიას მიანიჭა არამართლზომიერი უპირატესობა, რის შედეგადაც ქვეყანაში, მიმოქცევაში მოხვდა არსებულ საჭიროებაზე მეტი ფსიქოტროპული და მასთან გათანაბრებული მედიკამენტი.

აღნიშნულ საქმეზე გამოძიება მიმდინარეობს საქართველოს სისხლის სამართლის კოდექსის 332-ე მუხლის პირველი ნაწილითა და 25 - 332-ე მუხლის პირველი ნაწილით, რაც გულისხმობს სახელმწიფო მოხელის მიერ სამსახურეობრივი მოვალეობის ბოროტად გამოყენებას. მუხლი სასჯელის სახით ითვალისწინებს თავისუფლების აღკვეთას 3 წლამდე ვადით.

ანა მებურიშვილი