საზოგადოება

მაია ნიკოლეიშვილი დასკვნაში მიუთითებს, რომ დანების გარდა სხვა საგნებიც იყო გამოყენებული და ამაში აბსოლუტურად ვეთანხმები - ზაზა სარალიძე

ხორავას ქუჩაზე მოკლული დავით სარალიძის მამამ, ზაზა სარალიძემ აღნიშნა, რომ სრულიად ეთანხმება ექსპერტ მაია ნიკოლეიშვილის დასკვნას, რომლის მიხედვით დავით სარალიძისა და ლევან დადუნაშვილის ტანსაცმელზე არსებული ჭრილობები ცხადყოფს, რომ დაჭრისას დანების გარდა სხვა საგნებიც იყო გამოყენებული.

„მე ვთქვი, რომ შეიძლება, არ ვენდობოდე მაია ნიკოლეიშვილის დასკვნას, მაგრამ მინდა აღვნიშნო, რომ მან მოიტანა ისეთი რამ სასამართლოზე, რაც თავად სამხარაულმა დამალა. არ იმსჯელა ტანსაცმელებზე არსებულ დაზიანებებზე და არ იმსჯელა მე-11 ჭრილობაზე ჩემი შვილის ნაწილში, რომელიც დადგინდა მომაკვდინებელ ჭრილობად. ქალბატონი მაია დასკვნაში მიუთითებს იმ გარემოებას, რომ დანების გარდა სხვა საგნებიც იყო გამოყენებული. ამ ნაწილშიც ვეთანხმები აბსოლუტურად. ტანსაცმელზე მიყენებული დაზიანებები პირდაპირ ამბობს, რომ არ იყო მხოლოდ დანები, არამედ იყო სამკუთხედი ფორმის ან პირამიდისებრი იარაღი, შესაძლოა ქლიბი. ერთ-ერთ ჭრილობაზე თქვა, რომ შესაძლებელია, ყოფილიყო მაკრატლის მსგავსი იარაღი გამოყენებული. სასამართლომ იმიტომ არ გაიზიარა ალბათ, რომ ქალბატონმა მაიამ ზუსტად ვერ დაასაბუთა გარკვეული დეტალები. ჩემთვის ის დაზიანებები იყო ზუსტად მნიშვნელოვანი, რაც მოიტანა ქალბატონმა მაიამ სასამართლო პროცესზე. დანარჩენისთვის სიმართლე გითხრათ აღარც მიმიქცევია ყურადღება. სამკუთხედი დაზიანება მეორდება ლევან დადუნაშვილის ტანსაცმელზეც. ფრთისებური დაზიანებები ჩემი შვილისა და ლევანის ტანსაცმელზე გაჭრილი ვაშლებივით გვანან ერთმანეთს“, - განაცხადა სარალიძემ ხორავას ქუჩის საქმის შემსწავლელი დროებითი საპარლამენტო საგამოძიებო კომისიის მესამე სხდომაზე.

მან ასევე აღნიშნა, რომ მაია ნიკოლეიშვილმა თქვა არა მაკრატლით მიყენებულ ჭრილობებზე, არამედ მაკრატლის მსგავსი საგნით მიყენებულ ჭრილობებზე. სარალიძის თქმით, ექსპერტი თავადაც გამორიცხავს, რომ მაკრატელი იყო გამოყენებული.