საზოგადოება

მამა გიორგის ჰქონდა შესაძლებლობა აუდიენცია მოეთხოვა პატრიარქთან, წერილის გაგზავნის აუცილებლობა არ იყო - მამა მიქაელ ბოტკოველი

კათოლიკოს-პატრიარქის მდივნის, მამა მიქაელ ბოტკოველის განცხადებით, წერილის შინაარსიდან გამომდინარე, რომელიც თითქოს მამა გიორგი მამალაძემ ორი თვის წინ პატრიარქს გაუზაგვნა, შეიძლება ვივარაუდოთ, რომ ის ნამდვილად მამა გიორგის გაგზავნილია.

ამასთან, როგორც მამა მიქაელ ბოტკოველმა აღნიშნა, მამა გიორგის პატრიარქთან ურთიერთობა ეპისტოლარულ ჟანრში არ უნდა დასჭირვებოდა, რადგან მას როგორც საპატრიარქოს ქონების მართვის ხელძღვანელის მოადგილეს, პატრიარქთან აუდიენციის მოთხოვნა არ უდა გაჭირვებოდა.

„მეც, რუსთავი2 -ის მეშვეობით შევიტყვე ამის შესახებ. თემები, რომელბზეც არის იქ საუბარი ნამდვილად შედიოდა მამა გიორგისთან, მის განსახილველ საკითხთა შორის იყო. დიდი ალბათობით, თუ რა თქმა უნდა, ამას მტკიცებულება სჭირდება და მამა გიორგის ალბათ ექნება ამის საშუალება დაადასტუროს ან უარყოს, თემატიკიდან გამომდინარე ეს შესაძლებელია იყოს მისი წერილი. რადგან იქ ისეთ საკითხებზეა საუბარი, რომლებთანაც მას ჰქონდა შემხებლობა პირდაპირი თუ არა პირდაპირი. მაგრამ მე აქედანვე მინდა გითხრათ, რომ ამ წერილში ასახული ბევრი საკითხი არის ძალიან დრამატიზირებული და მისი ასეთი ეპისტოლარული ჟანრით პატრიარქისთვის მიწოდება ვფიქრობ არ იქნებოდა სწორი. მამა გიორგის ჰქონდა, მის უწმინდესობასთან, როგორც ქონების სამსახურის უფროსის მოადგილეს, როგორც კლინიკის დირექტორს შეხვედრის შესაძლებლობა და ასეთი წერილის გაგზავნის აუცილებლობა არ ექნებოდა.

პატრიარქი არ არის ჩაკეტილი ადამიანი და მასთან რიგითი სასულიერო პირებიც კერძო საკითხებზე ხშირად მიდიან და ესაუბრებიან, მითუმეტეს როდესაც არის ადამიანი ქონების მართვის სამსახურის უფროსის მოადგილე მას ნებისმიერ დროს შეეძლებოდა, რომ მოეთხოვა მის უწმინდესობასთან აუდიენცია და არც ამის ნაკლებობას განიციდიდა მამა გიორგი, რადგან ის ძალიან ხშირად იმყოფებოდა საპატრიაქოში“,-აღნიშნა მამა მიქაელ ბოტკოველმა.

მონიკა დავლიანიძე