საზოგადოება
მარეგულირებელი გასაუქმებელია, ის საბიუჯეტო წურბელად არის ჩამოყალიბებული - საკაბელო ოპერატორების აქცია მარეგულირებელ კომისიასთან
მცირე საკაბელო ოპერატორები მარეგულირებელ კომისიასთან აქციას მართავენ.
აქციაზე იმ კომპანიის წარმომადგენლები იმყოფებიან, რომლებმაც ქართულ ტელეარხებთან დაკავშირებით დაწესებულ გადასახადზე შეთანხმებას ვერ მიაღწიეს.
ერთ-ერთი საკაბელო ოპერატორის წარმომადგენლის თქმით, მერეგულირებელმა კომისიამ ბაზარაზე ურთიერთობები უნდა დაარეგულიროს.
მისი ინფორმაციით, აქციის მონაწილეებს მარეგულირებელი კომისიის წარმომადგენლები 12:00-ზე შეხვდებიან.
„მარეგულირებელმა უნდა შეასრულოს თავისი ფუნქციები, რომელიც პრაქტიკულად კარგა ხანია თავის ფუნქციებს არ ასრულებს. გუშინ შემოგვთავაზეს, რომ დღეს 12 საათზე შეგხვდებიან, იმიტომ რომ იცოდნენ 11 საათზე აქცია გვქონდა დაანონსებული. მარეგულირებელი გასაუქმებელია, იმიტომ რომ საბიუჯეტო წურბელად არის ჩამოყალიბებული“.- განაცხადა აქციის ერთ-ერთმა წევრმა.
კიდევ ერთი ოპერატორის წარმომადგენელი აღნიშნავს, რომ ერთის მხრივ კანონი ოპერატორებს ავალდებულებს, რომ ყველა არხი მაყურებელს უწყვეტ რეჟიმში უნდა მიეწოდებოდეს, მეორეს მხრივ კი, ამის სანაცვლოდ თანხას ითხოვენ.
„ამ ექვსი არხიდან სამი არხი არის საინფორმაციო, რომლებსაც საერთო მაუწყებლობის ლიცენზია გააჩნია. იმ სამი არხის გათიშვაზეა ზუსტად პრობლემა. კანონი მავალდებულებს ეს არხები ჩართული იყოს, იმიტომ რომ აბონენტს ჭირედება ალტერნატიული ინფორმაცია. ამაში ვიჭედებით, რომ ერთის მხრივ კანონი მავალდებულებს და მეორეს მხრივ ამის სანაცვლოდ თანხას ითხოვენ“,-განმარტა აქციის მონაწილემ.
დღეიდან ქართული არხები ფასიანი გახდა. თუმცა, მსხვილმა საკაბელო ოპერატორებმა შეთანხმებას მიაღწიეს და მათ მომხმარებელს სააბონენტო გადასახადი არ გაუძვირდა.
მონიკა დავლიანიძე