საზოგადოება

მარიხუანას დეკრიმინალიზაციაზე მსოფლიოს სხვადასხვა ქვეყნებში მუშაობა მიმდინარეობს და ეს პროცესი საქართველოს გარეშე არ ჩაივლის _ ლაშა კილაძე

მარიხუანას დეკრიმინალიზაციას როცა ითხოვენ არასამთავრობო სექტორის წარმომადგენლები, ეს ნორმალურია, მაგრამ პოლიტიკური პარტიების მხრიდან ამის მოთხოვნა მხოლოდ ბოტანიკური სოლიდარობაა, – ამის შესახებ დღეს გამართულ პრესკონფერენციაზე „ფსიქიკური ჯანმრთელობისა და ნარკომანიის პრევენციის ცენტრის“ ხელმძღვანელმა, ლაშა კილაძემ განაცხადა.

იგი ვარაუდობს, რომ მარიხუანას მოხმარებასთან მიმართებაში, კანონის ლიბერალიზაცია მოხდება, თუმცა ლეგალიზაციასთან ერთად, გაიზრდება მარიხუანას მომხმარებელთა რიცხვიც, ამისთვის „ფსიქიკური ჯანმრთელობისა და ნარკომანიის პრევენციის ცენტრის“ ხელმძღვანელი სახელმწიფოს პრევენციისკენ მოუწოდებს.

„დღესდღეობით, ფაქტია, რომ კანონმდებლობის ლიბერალიზაცია არის ერთ-ერთი აქტიური მსოფლიოში და ეს პროცესები, მეეჭვება, რომ საქართველოს გარეშე განვითარდეს. ვვარაუდობ, რომ მოხდება მარიხუანას დეკრიმინალიზაცია, რადგან ეს ამ ეტაპზე არის ვალიდური გამოსავალი.

რისკები მრავალფეროვანია და როცა ამ რისკების თაობაზე არ ხდება ინფორმაციის მიწოდება საზოგადოებისთვის, ეს სარისკოა.

გაიზრდება მომხმარებელთა რიცხვი, თუმცა უნდა იყოს აქტიური კამპანია სახელმწიფოს მხრიდანაც, არასამთავრობო ორგანიზაციების მხრიდანაც და პოლიტიკური პარტიებისგანაც.

მარიხუანას დეკრიმინალიზაციას როცა ითხოვენ არასამთავრობო სექტორის წარმომადგენლები, ეს ნორმალურია, მაგრამ პოლიტიკური პარტიების მხრიდან ამის მოთხოვნა მხოლოდ ბოტანიკური სოლიდარობაა. ჩვენ გვახსოვს „ბიოს“ გავრცელებასთან დაკავშირებით ერთობლივი კამპანია და ამ ყველაფერმა საკმაოდ ეფექტური შედეგი გამოიღო“, – განაცხადა ლაშა კილაძემ.