პოლიტიკა
მარიხუანას ექსპორტმა რაც ავღანეთსა და კოლუმბიაში მოიტანა, საქართველოშიც იმავეს მოიტანს, სხვას არაფერს - მეუფე იაკობი
ბოდბელი ეპისკოპოსის, სრულიად საქართველოს კათოლიკოს-პატრიარქის ქორეპისკოპოსის, მეუფე იაკობის შეფასებით, ექსპორტზე გასატანად სამედიცინო და კოსმეტიკური მიზნით საქართველოში მარიხუანის მოყვანა-წარმოება სარისკოა.
მისი თქმით, ძალოვანი უწყებები არ არიან იმდენად სანდონი, რომ მათ დაეკისროთ პლანტაციების დაცვა.
„ეს შინაგან საქმეთა სამინისტროს აზრია. ვფიქრობ, ეს დიდი შეცდომაა. შეიძლება ბიუჯეტზე ფიქრობდნენ, მაგრამ ეროვნულ უსაფრთხოებაზე, ვფიქრობ, საერთოდ არ უფიქრიათ. მარიხუანას ექსპორტმა რაც ავღანეთსა და კოლუმბიაში მოიტანა, საქართველოშიც იმავეს მოიტანს, სხვას არაფერს. ჩვენთან ნდობის ხარისხი არცერთ ძალოვან უწყებას არ აქვს ისეთი, რომ პლანტაციების დაცვა ჩავაბაროთ“, – უთხრა მეუფე იაკობმა ჟურნალისტებს საპატრიარქოს ქართულ უნივერსიტეტში ნარკოტიკული საშუალებების დეკრიმინალიზაციის საკითხებზე მიმდინარე კონფერენციის დაწყებამდე.
ეპისკოპოსის აზრით, მარიხუანას მოწევის გამო ადამიანს არ უნდა იჭერდნენ, თუმცა გარკვეული ზომები უნდა არსებობდეს, რათა მარიხუანას მოწევა არ ხდებოდეს სამუშაო ადგილებზე და არსებობდეს შეზღუდვები.
ცნობილი ხდება, რომ მთავრობას მომზადებული აქვს საკანონმდებლო ინიციატივა, რომელიც ნებადართულს ხდის საქართველოში მარიხუანას წარმოებას, ექსპორტზე გატანის მიზნით - ფარმაცევტული და კოსმეტიკური საშუალებისათვის.