პოლიტიკა

მე კი გადავწყვიტე დავტოვო მიხეილ სააკაშვილი - ტარიელ ლონდარიძე

ნაციონალური მოძრაობის წევრმა, ტარიელ ლონდარიძემ ე.წ მიხეილ სააკაშვილის ფრთა დატოვა.

როგორც ლონდარიძემ Facebook-ში პირად გვერდში დაწერა, მიხეილ სააკაშვილმა პარტიაში დაპირისპირების განმუხტვა ვერ შეძლო და გამაერთიანებლის როლის შესრულება.

მისი თქმით, მან მიიღო გადაწყვეტილება დატოვოს მიხეილ სააკაშვილი და სცადოს დაუმტკიცოს საკუთარ თავს, რომ მის გარეშეც შეუძლია ებრძოლოს ქვეყნის მტრებს.

„ჩემთვის ყველაზე მნიშვნელოვანი ენმ-ში მიმდინარე დაპირისპირებაში მიხეილ სააკაშვილის როლია, რომელმაც ვერ შეძლო პარტიაში დაპირისპირების განმუხვტა და გამაერთიანებელი ლიდერის როლის შესრულება, რაც პირადად ჩემთვის ძალიან სამწუხაროა. დრო გაივლის, ვნებათაღელვა ჩაცხრება, ცივ გონებაზე თითოეული დაფიქრდება და დასკვნებს გამოიტანს, მე კი გადავწყვიტე დავტოვო მიხეილ სააკაშვილი და ვცადო დავუმტკიცო საკუთარ თავს, რომ მის გარეშეც შემიძლია ვებრძოლო ჩემი ქვეყნის მტრებს. იმედს ვიტოვებ, დადგება კვლავაც გაერთიანების დრო. ყველას დიდი მადლობა, მიუხედავად ჩვენი პოზიციებისა ყველანი მიყვარხართ და დიდ პატივს გცემთ. საერთო მტრის წინააღმდეგ ბრძოლაში გისურვებთ გამარჯვებას, თქვენ ფრონტის ერთი ფლანგიდან და ჩვენ მეორე ფლანგიდან“,-ნათქვამია ლონდარიძის განცხადებაში.

მონიკა დავლიანიძე