სამართალი

“მე პოლიტიკური პატიმარი ვარ“ - თელავის საკრებულოს წევრს აღკვეთის ღონისძიებად პატიმრობა შეეფარდა

თელავის რაიონულმა სასამართლომ ოჯახში ძალადობის ბრალდებით დაკავებულ თელავის მუნიციპალიტეტის საკრებულოს დეპუტატს, მიხეილ გრემელაშვილს აღკვეთის ღონისძიებად პატიმრობა შეუფარდა.

დღევანდელ სხდომაზე მოსამართლე თამარ კაპანაძემ არ დააკმაყოფილა დაცვის მხარის შუამდგომლობა გრემელაშვილისთვის დამატებითი საპროცესო იძულებითი ღონისძიებების გამოყენებისა და ათი ათას ლარიანი გირაოს შეფარდების შესახებ.

მიხელ გრემელაშვილს ბრალდების მხარე მეუღლესა და შვილების თანდასწრებით განხორციელებულ ფიზიკურ ძალადობას, ასევე არასრულწლოვანი შვილის მიმართ სიცოცხლის მოსპობის მუქარას და ცეცხლსასროლი იარაღის მართლსაწინააღმდეგო შეძენა-შენახვას ედავება.

გრემელაშვილი თავს უდანაშაულოდ მიიჩნევს და აცხადებს, რომ მეუღლისა და შვილების მისამართით არ უძალადია, არც უკანონო იარაღი ჰქონია. ბრალდებულმა შუამდგომლობით მიმართა სასამართლოს და მთავარ პროკურორთან შეხვედრა და მისთვის დეტალების გაცნობა მოითხოვა.

„ჩემი შვილები მარიამმა იყიდა იაფად და ყიდის ძვირად, მე პოლიტიკური პატიმარი ვარ“, - ამის შესახებ თელავის საკრებულოს წევრმა მიხეილ გრემელაშვილმა სასამართლო პროცესზე განაცხადა.

მიხეილ გრემელაშვილი, რომელიც ძალადობაში მისმა ნათესავმა, სუროგაციის ცენტრის ხელმძღვანელმა, მარიამ კუკუნაშვილმა ამხილა, თელავის საკრებულოში ფრაქცია „პატრიოტთა ალიანსის“ თავმჯდომარის მოადგილეა.

საქმეზე წინასასამართლო სხდომა 27 აგვისტოს ჩაინიშნა.