საზოგადოება
მე შეხვედრა მქონდა პუტინთან და მას ვუთხარი, რომ სეპარატიზმი გადამდები სენია - ილია მეორე
საქართველოს კათოლიკოს პატრიარქმა, უწმინდესმა და უნეტარესმა ილია მეორემ სერბეთის რესპუბლიკის ეროვნული ასამბლეის სპიკერთან, მაია გოვიკოვიჩთან შეხვედრაზე ყურადღება გაამახვილა სეპარატიზმის პრობლემაზე.
ილია მეორემ აღნიშნა, რომ სერბეთი და საქართველოს ერთი და იმავე ტერიტორიული პრობლემის წინაშე დგანან და იმედი გამოთქვა, რომ მომავალში ეს გამოსწორდება საერთაშორისო საზოგადოების მეშვეობით.
„ვფიქრობ, თქვენი ვიზიტი უფრო მეტად შეკრავს ურთიერთობას საქართველოსა და სერბეთს შორის. მე შეხვედრა მქონდა პუტინთან და მას ვუთხარი, რომ სეპარატიზმი გადამდები სენია. აფხაზეთი, ცხინვალის რეგიონი და სხვა რეგიონები იყო 20% საქართველოს ტერიტორიისა. ასე რომ, ჩვენ ერთი პრობლემის წინაშე ვდგავართ. დახმარება და თანადგომა აუცილებელია. ვფიქრობ, მუდამ ასე ვერ გაგრძელდება და ეს უნდა იყოს გამოსწორებული საერთაშორისო ძალების მიერ. ვფიქრობ, ეს მომავალში შესაძლებელი გახდება“, -თქვა პატრიარქმა . შეხვედრის ვიდეომასალა საპატრიარქოს არხმა „ერთსულოვნებამ“ გაავრცელა.