სამართალი

მებაჟე ოფიცრებმა არადეკლარირებული სიგარეტი აღმოაჩინეს

საბაჟო გამშვებ პუნქტებში: „წითელი ხიდი“ და „სარფი“, ერთი კვირის განმავლობაში სიგარეტის კანონდარღვევით შემოტანის მცდელობის ფაქტები აღიკვეთა.

ფინანსთა სამინისტროს შემოსავლების სამსახურის ცნობით, აღნიშნული უწყების მებაჟე ოფიცრებმა, ეჭვის საფუძველზე, საქართველოსა და აზერბაიჯანის მოქალაქეების ფიზიკური და კუთვნილი ავტომანქანის დათვალიერების შედეგად, ჯამში, 11,340 ღერი არადეკლარირებული სიგარეტი აღმოაჩინეს.

სგპ „წითელი ხიდზე“ 16 და 20 ოქტომბერს მომხდარი ფაქტების გამო, საქართველოს მოქალაქეებს ჩამოერთვათ საქონელი, სატრანსპორტო საშუალება და სანქციის სახით, ფულადი ჯარიმა, ათას-ათასი ლარის ოდენობით შეეფარდათ. საქართველოს საბაჟო კოდექსის 168-ე მუხლის მე-3 ნაწილის შესაბამისად, სხვა სამართალდამრღვევ მოქალაქეებსაც ჩამოერთვათ საქონელი და თითოეულს სანქციის სახით, შეეფარდათ ფულადი ჯარიმა, ათას-ათასი ლარის ოდენობით.