საზოგადოება

მერაბ ღოღობერიძე გენინსპექციის თანამშრომელთან და სახალხო დამცველთან შეხვედრას ითხოვს

11-12 მარტის არეულობის ორგანიზებაში ბრალდებული მერაბ ღოღობერიძის ადვოკატის, პაატა შავაძის განცხადებით, მისი კლიენტი სასჯელაღსრულებისა და პრობაციის სამინისტროს გენერალური ინსპექციის გამომძიებელთან და სახალხო დამცველთან - უჩა ნანუაშვილთან შეხვედრას ითხოვს.

შავაძის თქმით, უჩა ნანუაშვილი ვალდებულია, ღოღობერიძის თხოვნა შეასრულოს და შეხვდეს.

„იგი [ღოღობერიძე] გენინსპექციის თანამშრომელთან და სახალხო დამცველთან უჩა ნანუაშვილთან შეხვედრას ითხოვს. ჩვენ სასამართლო სხდომაზე შესავალი სიტყვით წარვდგებით და იმ გარემოებებზე ვისაუბრებთ, რომელიც ღოღობერიძის უდანაშაულობას დაამტკიცებს. რაც შეეხება სახალხო დამცველს, უჩა ნანუაშვილი ვალდებულია, შეხვდეს და მოუსმინოს",- განაცხადა შავაძემ.

შეგახსენებთ, დღეს ბათუმის საქალაქო სასამართლოში ბათუმის მოვლენებზე სისხლის სამართლის ბრალდებით დაკავებულების - მერაბ ღოღობერიძისა და ირაკლი ჩხვირკიას პროცესი მიმდინარეობს.