უახლესი ამბები
არქივი
პოლიტიკა
მერაბ მორჩაძე საერთოდ ტყუილად გაწირეს თავიდანვე, ეს იყო სუბელიანის ხრიკები - ზაზა სარალიძე
ხორავას ქუჩაზე მოკლული დავით სარალიძის მამა, ზაზა სარალიძე ამავე საქმეზე მოწმეზე ზემოქმედების ბრალდებით დაკავებული მერაბ მორჩაძის სასამართლო დარბაზიდან გათავისუფლებას გამოეხმაურა. სარალიძის თქმით, მისთვის გაუგებარია, რატომ იყო დაკავებული აქამდე მორჩაძე მაშინ, როდესაც დავით სარალიძის მკვლელები დაუსჯელები არიან.
სარალიძის ვარაუდით, მორჩაძის დაკავებით მისი გაჩერება სცადეს.
„ეს იყო უბრალოდ მოჩვენებით პასუხისგებაში მიცემული პირი, რომ ვითომ ჩაეხშოთ ეს მღელვარება. თავიდანვე ვთქვი, რომ ეს ადამიანი საერთოდ ტყუილად გაწირეს თავიდანვე. ეს იყო სუბელიანის ხრიკები, ვიღაც უნდა მიეცათ პასუხისგებაში და რომ გავჩერებულიყავი მე, მაგალითად, და მე ვითხოვ ჩემი შვილის მკვლელების დასჯას და არა ვინ ვიღაცას ფული აჩუქა და ვინ ვიღაცას დაეხმარა. არ ვიცი, რას აკეთებენ მაგ მხრივ, არ ვიცი, რატომ ცნეს დამნაშავედ, ესეც არ ვიცი, რატომ აძლევენ პასუხისგებაში, ესეც არ ვიცი, საერთოდ ეს ადამიანი ვინ არის, არ ვიცი,“ - განაცხადა სარალიძემ.
მორჩაძე სასამართლომ დამნაშავედ ცნო. მორჩაძე საპროცესო შეთანხმების საფუძველზე გათავისუფლდა, მას ორწლიანი პირობითი სასჯელი შეეფარდა.
ცნობისთვის, მერაბ მორჩაძე 8 ივნისს სსკ-ის 372-ე მუხლით დააკავეს, რაც მოწმეზე ზემოქმედებას გულისხმობს, საუბარია საქმის ერთ-ერთ მთავარ მოწმე მიხეილ კალანდიაზე.