საზოგადოება

მეტროს გაფიცულ მემანქანეებსა და თბილისის მთავრობას შორის მოლაპარაკებები დღესაც გაიმართება

მეტროს გაფიცული მემანქანეების განცხადებით, დედაქალაქის მთავრობასთან მოლაპარაკებები დღესაც გაგრძელდება.

მემანქანეები თბილისის მერთან კახა კალაძესთან შეხვედრას დადებითად აფასებენ.

„მერის აქ მოსვლა არის დადებითი ნაბიჯი, რადგანაც დაიწყო მოლაპარაკებების ეტაპი. საბედნიეროდ, გაიმართა ეს შეხვედრა ჩვენსა და კახა კალაძეს შორის, მაგრამ სამწუხაროდ, არ იყო ის კონკრეტიკა, რაც დააკმაყოფილებდა გაფიცულ ადამიანებს. ვიმედოვნებთ, რომ ეს მოლაპარაკებები დღესაც გაგრძელდება და კონკრეტულ დადებით შედეგამდე მივალთ.

ჩვენ ვფიქრობთ, რომ დღეს გაგრძელდება შეხვედრები მოლაპარაკების მაგიდასთან, დადებითად და ლოგიკურ დასკვნამდე მივა ეს ყველაფერი. ჩვენ გვჭირდება უფრო მეტი კონკრეტიკა და გამოკვეთილი დეტალები ამ საკითხთან დაკავშირებით“, – განაცხადა მემანქანე რატი კაპანაძემ.

გლდანის დეპოსთან აქცია კვლავ მიმდინარეობს. მემანქანეები მესამე დღეა, შიმშილობენ. აქციის მონაწილეების თქმით, აქციები გაგრძელდება, სანამ მათი მოთხოვნები არ შესრულდება.