პოლიტიკა

მიხაილ შვიდკოისთან არანაირი სამთავრობო შეხვედრა არ იგეგმება - მიხეილ ჯანელიძე

საქართველოს საგარეო საქმეთა მინისტრის, მიხეილ ჯანელიძის განცხადებით, რუსეთის პრეზიდენტის მრჩეველი, მიხაილ შვიდკოი საქართველოში პირადი მიზნით ჩამოვიდა.

შეკითხვაზე, დაურღვევია თუ არა რუსეთის ყოფილ კულტურის მინისტრს კანონი ოკუპაციის შესახებ, ჯანელიძემ უპასუხა, რომ ეს შესაბამისი ორგანოების დასადგენია.

„არანაირი სამთავრობო შეხვედრა არ იგეგმება. როგორც მოვისმინე, ეს ადამიანი საქართველოში პირადი ვიზიტით იმყოფება, ხოლო არის თუ არა ოკუპაციის შესახებ კანონის დარღვევა, ეს, რა თქმა უნდა, შესაბამისი ორგანოების დასადგენია. საქართველო სამართლებრივი სახელმწიფოა და შესაბამისად ყველა უწყება კანონის შესაბამისად მოქმედებს, ამ შემთხვევაშიც იგივე ნაბიჯები გადაიდგმება“,- განაცხადა მინისტრმა.

მიხაილ შვიდკოი თბილისში საერთაშორისო სამხრეთკავკასიურ მედიაფორუმზე საპატიო სტუმრის სტატუსით იმყოფება.

ანა მებურიშვილი