პოლიტიკა

მიხეილ ჯანელიძე რუსეთის საკითხთან დაკავშირებით პარლამენტში მისვლას არ გეგმავს

საქართველოს საგარეო საქმეთა მინისტრი მიხეილ ჯანელიძე რუსეთისთვის დახმარების თხოვნით მიმართვის საკითხთან დაკავშირებით, პარლამენტში მისვლას არ აპირებს.

ამის შესახებ ჯანელიძემ „ქრონიკის“ პირდაპოირ ეთერში განაცხადა.

მისი თქმით, ხელისუფლება აღნიშნულ პროცესში იმდენად ღია იყო და კომუნიკაციისთვის მზად, რომ პარლამენტში მისვლით დეპუტატებს ახალს ვერაფერს ეტყვის.

„ის განცხადებები, რასაც ჩვენ ვისმენთ ოპოზიციიდან, არის უპასუხისმგებლო განცხადება. ოპოზიცია მაშინ იქნება პასუხისმგებელი თავის ქვეყანაზე, როცა ის მოვა ხელისუფლებაში და მაშინ აგოს მან პასუხი თითოეული კრიზისული სიტუაციის გადალახვის დროს.

ოპოზიციის შეფასებები, რაც მე მოვისმინე ამ საკთხთან დაკავშირებით, სრულიად უპასუხისმგებლოა და პოლიტიკური სპეკულაციის მატარებელია. ოპოზიციამ იცოდა რუსეთის დახმარების შესახებ 22 რიცხვშივე. მთავრობა ყოველთვის მზად იყო და ღია იყო ნებისმიერი კომუნიკაციისთვის, ისევე როგორც დღეს რჩება ღია. ამიტომ დამატებით ინფორმაცია, იმის გარდა რაც უკვე საჯაროდ მიწოდებულია საზოგადოებისთვის, ჩვენ არ შეგვიძლია არავის მივაწოდოთ, რადგან ეს არის სრულყოფილი ინფორმაცია“,-განაცხადა მინისტრმა.

მონიკა დავლიანიძე