საზოგადოება

მიხეილ ჯანელიძეს „აღმოსავლეთ პარტნიორობის“ მინისტერიალზე აფგან მუხთარლიზე დაუსვეს კითხვები - ედგარ რინკევიჩი

ლატვიის საგარეო საქმეთა მინისტრის ედგარს რინკევიჩის განცხადებით, ევროკავშირის წევრი-ქვეყნების საგარეო საქმეთა მინისტრებმა, ქართველ კოლეგას აფგან მუხთარლის საქმესა და საკონსტიტუციო რეფორმებზე დაუსვეს კითხვები.

ამის შესახებ რინკევიჩმა საზოგადოებრივ მაუწყებელს ლუქსემბურგში განუცხადა, სადაც „აღმოსავლეთ პარტნიორობის“ მინისტერიალი მიმდინარეობს.

რინკევიჩის თქმით, აღმოსავლეთის პარტნიორობის შეხვედრის დროს ყოველთვის განიხილება მედიის თავისუფლების, კანონის უზენაესობისა და ადამიანის უფლებების დაცვის საკითხები.

„გვსურდა, მოგვესმინა, რეფორმების პროგრესის კუთხით რა მისწრაფებები აქვს საქართველოს აღმოსავლეთ პარტნიორობის სამიტზე. პარტნიორობის წევრი ქვეყნების საგარეო საქმეთა მინისტრებს ჰქონდათ შესაძლებლობა, მინისტრისთვის კითხვები დაესვათ. დელეგაციების მიერ დასმული კითხვები ეხებოდა რეფორმებს, ბევრმა წამოჭრა დაგეგმილი საკონსტიტუციო ცვლილებებისა და საარჩევნო კანონმდებლობის შესახებ კითხვები, მედიის თავისუფლებასთან დაკავშირებული თემები. შევეხეთ აზერბაიჯანელი ჟურნალისტის საქმეს. ჩვენ აფგან მუქტარლის გატაცების შესახებ გამოძიების შედეგებს ველოდებით. აღმოსავლეთ პარტნიორებთან შეხვედრის დროს, ყოველთვის განვიხილავთ მედიის თავისუფლებას, კანონის უზენაესობას, ადამიანის უფლებების დაცვას“,-აღნიშნა ლატვიის საგარეო საქმეთა მინისტრმა.

მისივე თქმით, პირველ რიგში მუხტარლის საქმეზე გამოძიების შედეგები დაინტერესდნენ.

„შემაშფოთებელია, რომ შესაძლოა, ჟურნალისტის გატაცება მოხდა. აზერბაიჯანზე, სომხეთზე, უკრაინასა და მოლდოვაზე მსჯელობისას, მედიის თავისუფლების თემები ყოველთვის განიხილება. კიდევ ერთხელ გეტყვით, მუხტარლის საქმეზე სწრაფ და მიუკერძოებელ გამოძიებას ველოდებით. აზერბაიჯანის ხელისუფლებას დაკავებული ჟურნალისტის გათავისუფლებისკენ მოვუწოდებთ. ჩვენ საქართველოს საგარეო საქმეთა მინისტრმა დაგვარწმუნა, რომ საქართველოს ხელისუფლება ჟურნალისტის საქმის გამოძიებას ძალიან სერიოზულად უდგება. იმედი გვაქვს, რომ მუხტარლის გატაცების საქმეზე შესაბამისს ინფორმაციის, რაც შეიძლება სწრაფად მივიღებთ“,- აღნიშნა ლატვიის საგარეო საქმეთა მინისტრმა.