საზოგადოება
მიხეილ გიორგაძემ ოპერის თეატრს ახალი სამხატვრო ხელმძღვანელი წარუდგინა
კულტურისა და ძეგლთა დაცვის მინისტრმა მიხეილ გიორგაძემ ოპერის თეატრს ახალი სამხატვრო ხელმძღვანელი, საოპერო მომღერალი ბადრი მაისურაძე წარუდგინა. ბადრი მაისურაძე სამხატვრო ხელმძღვანელად 27 ოქტომბერს, დროებითმა სარეკომენდაციო საბჭომ ხმათა უმრავლესობით აირჩია, დღეიდან კი ძალაში შევიდა მიხეილ გიორგაძის 2 ნოემბრის ბრძანება - ოპერისა და ბალეტის თეატრის სამხატვრო ხელმძღვანელის პოსტზე ბადრი მაისურაძის დანიშვნის შესახებ.
ბადრი მაისურაძემ საქართველოს შოთა რუსთაველის თეატრისა და კინოს სახელმწიფო უნივერსიტეტი და თბილისის ვანო სარაჯიშვილის სახელობის სახელმწიფო კონსერვატორია დაამთავრა, მოგვიანებით სწავლა განაგრძო მილანსა და მოსკოვში.
ის 1994 წლიდან დღემდე მოსკოვის დიდი თეატრის სოლისტია, მსოფლიოს წამყვან თეატრებში შესრულებული აქვს 40-ზე მეტი პარტია. 2002 წლიდან გალინა ვიშნევსკაიას საოპერო სიმღერის ცენტრის პროფესორია, არის არაერთი პრესტიჟული კონკურსის ჟიურის წევრი და რეგულარულად ატარებს მასტერკლასებს გერმანიაში, იტალიაში, საფრანგეთში, კანადასა და ავსტრალიაში.
ბადრი მაისურაძე სამხატვრო ხელმძღვანელის თანამდებობაზე ოთხი წლის ვადით აირჩიეს.
მარი ნამგალაძე