მსოფლიო

მიხეილ სააკაშვილის ადვოკატები მის პოლონეთში გაძევებას გაასაჩივრებენ

საქართველოს ყოფილი პრეზიდენტისა და ოდესის ექს-გუბერნატორის, მიხეილ სააკაშვილის ადვოკატები გეგმავენ, გაასაჩივრონ მისი დეპორტაცია პოლონეთში კიევის საოლქო ადმინისტრაციულ სასამართლოში. სარჩელი იქნება შეტანილი უკრაინის სახელწმიფო საიმიგრაციო სამსახურის, სახელწმიფო სასაზღვრო სამსახურისა და უკრაინის შსს-ის წინააღმდეგ.

როგორც სააკაშვილის ადვოკატმა, რუსლან ჩერნოლუცკიმ „ინტერფაქს-უკრაინას“ განუცხადა, სააკაშვილი და მისი უფლებადამცველები მოითხოვენ სასამართლოსგან, უკანონოდ მიიჩნიოს სააკაშვილის მიმართ 12 თებერვალს განხორციელებული ქმედებები. ასევე ოდესის ექს-გუბერნატორი მოითხოვს, სასამართლომ დაავალდებულოს უკრაინის სახელმწიფო საიმიგრაციო სამსახურის შესაბამისი სტრუქტურული ქვედანაყოფები, გააუქმონ გადაწყვეტილება, რომლის მიხედვით პოლიტიკოსი უკრაინიდან გააძევეს.

გუშინ სპეცრაზმელთა ჯგუფმა სააკაშვილი კიევში, რესტორან „სულგუნში“ დააკავა. შემდეგ ოდესის ექს-გუბერნატორი კერძო თვითმფრინავით პოლონეთში გადაიყვანეს „რეადმისიასთან“ [არალეგალის იმ ქვეყანაში დაბრუნება, საიდანაც ის არალეგალურად შევიდა სხვა სახელმწიფოში] დაკავშირებული განცხადების მიხედვით, რომელიც პოლონურ მხარეს უკრაინის ეროვნულმა საიმიგრაციო სამსახურმა მიაწოდა.

ანა მებურიშვილი