პოლიტიკა
მიხეილ სააკაშვილთან დაკავშირებული მოვლენები ქართულ-უკრაინულ ურთიერთობებზე არ აისახება - საქართველოს ელჩი უკრაინაში
უკრაინაში საქართველოს ელჩის, გელა დუმბაძის განცხადებით, მიხეილ სააკაშვილთან დაკავშირებული მოვლენები ვერ მოახდენს გავლენას ქართულ-უკრაინულ ურთიერთობებზე. ამის შესახებ მან “იმედის” ეთერში განაცხადა.
დუმბაძემ აღნიშნა, რომ საქართველოს ყოფილი პრეზიდენტისა და ოდესის ექს-გუბერნატორის გამო უკრაინის სამართალდამცველებთან განსაკუთრებული კონტაქტის დამყარების აუცილებლობა არ არსებობს.
„მაღალი დონის კეთილგანწყობაა და ეს პროცესი არანაირად არ აისახება ორი ქვეყნის კეთილმეზობლურ და მეგობრულ ურთიერთობებზე.
ამ შემთხვევაში რამე განსაკუთრებული კონტაქტი უკრაინის სამართალდამცავ ორგანოებთან ჩვენ არ გვაქვს. უკრაინის კონსტიტუციის მიხედვით, ამის აუცილებლობაც არ არსებობს“,-თქვა დუმბაძემ.
ელჩმა განაცხადა, რომ მოვლენების განვითარება დამოკიდებული იქნება მიხეილ სააკაშვილის საქმეზე 18 სექტემბერს ჩანიშნულ სასამართლო პროცესზე საზღვრის უკანონოდ გადაკვეთასთან დაკავშირებით.
ჟურნალისტის კითხვაზე, მოსალოდნელია თუ არა ექს-პრეზიდენტის ექსტრადირება, დუმბაძემ უპასუხა, რომ ესაა ურთიერთგამომდინარე სამართლებრივი ქმედებები და მიხეილ სააკაშვილის შესახებ საქართველომ უკრაინას ყველა შესაძლო დოკუმენტი გადასცა.
შეგახსენებთ, 10 სექტემბერს 20 საათზე მიხეილ სააკაშვილმა თავის მხარდამჭერებთან ერთად სასაზღვრო-გამშვები პუნქტი შეგინი გადაკვეთა.
გუშინ ლვოვში, სასტუმრო ლეოპოლისის წინ სააკაშვილმა ხელი მოაწერა ადმინისტრაციული სამართალდარღვევათა პროტოკოლს უკრაინის საზღვრის უკანონოდ გადაკვეთის შესახებ. მისი საქმის სასამართლო განხილვა 18 სექტემბერს გაიმართება.
გამოძიება სააკაშვილის საქმეზე 4 მუხლითაა აღძრული, რასაც დღეს ხულიგნობის მუხლიც დაემატა.