უახლესი ამბები
არქივი
საზოგადოება
მიმდინარე წელს აუდიტის სამსახური 102 ორგანიზაციის შემოწმებას გეგმავს
საქართველოს მთავარი აუდიტორის, ირაკლი მექვაბიშვილის ინფორმაციით, აუდიტის სამსახური 102 ორგანიზაციის შემოწმებას აპირებს. მექვაბიშვილმა აღნიშნა, რომ ფინანსურ დასკვნებს სახელმწიფო აუდიტის სამსახური მიმდინარე ექვსი თვის განმავლობაში შეიმუშავებს, აქცენტი კი 2017 წელს განხორციელებულ ფინანსურ ოპერაციებზე გაკეთდება.
„დაგეგმილია 102 აუდიტორული შემოწმება. აქედან გამოვყოფ იმას, რომ ფინანსური აუდიტის ნაწილში გვაქვს 25 აუდიტის დასკვნა, რომლის შედეგად ჩვენ შევძლებთ ბიუჯეტის დაფარვის მაჩვენებელი 5%-ით გავზარდოთ, ანუ ბიუჯეტის ხარჯვითი ნაწილის 86%- ს მოვიცავთ, რაც ძალიან მნიშვნელოვანი მაჩვენებელია.
გვაქვს სიახლე შესაბამისობის კუთხით დაგეგმილი. მთლიანად საჯარო სექტორში შევისწავლით შესყიდვების საკითხს ე.წ. ჰორიზონტალური აუდიტი იქნება და ასევე ავტოპარკის აუდიტს გავაკეთებთ. ასევე შესაბამისობის კუთხით არის 58 აუდიტი და განსაკუთარებით მინდა აღვნიშნო ეფექტიანობის აუდიტის მიმართულება, დაგეგმილია 19 აუდიტი და წინა წელთან შედარებით, პრაქტიკულად ამ ციფრს ვაორმაგებთ. ამგვარად გეგმა არის ძალიან აქტიური, დატვირთული, ვადებში გაწერილი. ფინანსურ ნაწილში ყველა დასკვნა დამტკიცდება მიმდინარე წლის 6 თვის განმავლობაში და ჩვენ აქ აქცენტს გავაკეთებთ 2017 წელზე, როგორც ფინანსურ, ასევე ეფექტიანობის ნაწილში“, -უთხრა მექვაბიშვილმა ჟურნალისტებს.
მისივე თქმით, მერიასთან დაკავშირებით დაგეგმილია 7 აუდიტი.
„მერიის ნაწილში 2 აუდიტი მიმდინარეობს, დანარჩენი 5 თემატიკა მზადდება და დაიწყება უახლოეს თვეებში“, -თქვა მთავარმა აუდიტორმა.