რეგიონები
მინდელის სახელობის შახტში 4 მეშახტე დაიღუპა
ტყიბულში, მინდელის სახელობის შახტში 4 მეშახტე დაიღუპა, 6 კი დაშავდა.
გავრცელებული ინფორმაციით, შემთხვევა იმავე უბანზე მოხდა, სადაც აპრილში 6 მუშა დაიღუპა. ცხედრები მაშველებმა უკვე ამოიყვანეს. რაც შეეხება დაშავებულებს, ისინი ტყიბულის საავადმყოფოში არიან გადაყვანილები.
მედიკოსების ინფორმაციით, ყველა მათგანს დამწვრობა აღენიშნება, თუმცა პაციენტების სიცოცხლეს საფრთხე არ ემუქრება.
ტყიბულში უკვე გაემგზავრა ჯანდაცვის სამინისტროს შრომის ინსპექტორთა ჯგუფი.
პროფკავშირების წარმომადგენელი გაგა ისაკაძე არ გამორიცხავს, რომ შახტში აფეთქება მომხდარიყო.
„სავარაუდოდ, დამწვრობა რადგან არის, ე.ი. აფეთქებაა. მტვერი იყო, ეს ხალხი კი გამოვიყვანეთ მალე, მაგრამ დათვალიერება ვერ მოხდა, დაუდგენელია მიზეზი, ვნახავთ. სავარაუდოდ გასული შემთხვევის მსგავსია რაღაც“- ამბობს ისაკაძე.
შინაგან საქმეთა სამინისტროს ინფორმაციით, მონხდართან დაკავშორებით გამოძიება სისხლის სამართლის კოდექსის 240-ე მუხლის მეორე ნაწილით მიმდინარეობს, რაც სამთო, სამშენებლო ან სხვა სამუშაოს წარმოებისას უსაფრთხოების წესების დარღვევას გულისხმობს, რამაც ადამიანის სიცოცხლის მოსპობა გამოიწვია.