პოლიტიკა

მმართველ გუნდში არსებობს აზრთა სხვადასხვაობა და ამით ჩვენ ბუნებრივია, ვამაყობთ - ირაკლი კობახიძე

საქართველოს პარლამენტის თავმჯდომარის, ირაკლი კობახიძის განცხადებით, მომავალი საპარლამენტო არჩევნები შერეული სისტემით ჩატარდება, ხოლო პროპორციულ საარჩევნო სისტემაზე ქვეყანა 2024 წელს გადავა.

ირმა ნადირაშვილის კითხვაზე, რატომ არ დაუჭირა მხარი მმართველმა გუნდმა კობახიძის პოზიციას, რომ პროპორციული სისტემა 2020 წლისთვის ამოქმედებულიყო, პარლამენტის თავმჯდომარემ განაცხადა, რომ გუნდში არსებობს აზრთა სხვადასხვაობა, რითაც ამაყობენ.

„რაც შეეხება პროპორციული არჩევნების ვადას, უმრავლესობა შეჯერდა გარკვეულ გადაწყვეტაზე. იყო დისკუსია, აზრთა სხვადასხვაობა უმრავლესობის შიგნით. აქ ისე იყო დასმული საკითხი, თითქოს პარლამენტის თავმჯდომარე რასაც იტყვის, ერთხმად 115-ივე დეპუტატი აუცილებლად იმას უნდა მიჰყვეს. რა თქმა უნდა, უმრავლესობაში, მმართველ გუნდში არსებობს აზრთა სხვადასხვაობა და ამით ჩვენ ბუნებრივია, ვამაყობთ. შეუძლებელია, რომ 116-ივე ადამიანს ერთი და იგივე აზრი ჰქონდეს, განსაკუთრებით პრინციპულ საკითხებთან დაკავშირებით. არის გაჟღერებული პოზიცია, რომლის თანახმადაც მომავალი არჩევნები ტარდება შერეული სისტემით. საუბარია 3%-იანი ბარიერის დადგენაზე, ბლოკების გაუქმების პირობებში. ეს არის ის მოცემულობა, რომელზეც უმრავლესობა შეჯერდა და შემდეგ 2024 წლიდან საუბარია პროპროციულ სისტემაზე გადასვლაზე“, - განაცხადა კობახიძემ პარლამენტის რიგგარეშე სხდომაზე.

ანა მებურიშვილი