სამართალი
მოგიწევთ, გადაადგილოთ ჩემი გვამი - დავით ხარშილაძემ შიმშილობა გამოაცხადა
,,ქრონიკა პლუსის’’ რედაქტორის, ელისო კილაძის შვილმა, დავით ხარშილაძემ, პროტესტის ნიშნად შიმშილობა გამოაცხადა.
,,გამოწვევა მიღებულია. მოგიწევთ, გადაადგილოთ ჩემი გვამი’’, - განაცხადა დღევანდელ სასამართლო პროცესზე ბრალდებულმა, სადაც მას აღკვეთის ღონისძიების სახედ 2-თვიანი წინასწარი პატიმრობა შეეფარდა.
ის სამართალდამცველებმა 2 დღის წინ დიდი რაოდენობით ნარკოტიკული საშუალების შეძენა-შენახვის ბრალდებით დააკავეს. ხარშილაძე ბრალს არ აღიარებს და სასამართლოს მისი საქმის დაჩქარებული წესით განხილვას, თავისი ჯანმრთელობის მდგომარეობიდან გამომდინარე სთხოვს.
დღევანდელ პროცესზე დავით ხარშილაძემ განაცხადა, რომ მისი დაკავების დროს არაპროპორციული ძალის გამოყენება მოხდა. მისი თქმით, დაკავების შემდეგ მას ადვოკატთან დაკავშირების შესაძლებლობა არ მისცეს, შეუზღუდეს მხედველობა და დავით ხარშილაძე ვარაუდობს, რომ სამართალდამცველებმა მას ნარკოტიკული საშუალება სწორედ ამ დროს ჩაუდეს.
„გაურკვეველი რაღაც ნივთიერებები აღმოჩნდა ჩემს ჯიბეში, ეს მოხდა 3-4 წუთიან ინტერვალში, რა დროსაც მიწაზე ვიყავი სახით დაწოლილი,“ - განაცხადა დავით ხარშილაძემ.
საქმეზე განხილვა თბილისის საქალაქო სასამართლოში 18 აპრილისთვის დაინიშნა.
ნინო ექვთიმიშვილი