საზოგადოება

მომავალი კვირიდან ქართველი გადამზიდავებისთვის თურქეთში შესვლის ნებართვების გაცემა დაიწყება - ზურაბ დიასამიძე

ქართველი გადამზიდავებისთვის თურქეთში შესვლის ნებართვვა მომავალი კვირიდან გაიცემა. ამის შესახებ ერთ-ერთი სატრანსპორტო კომპანიის ხელმძრვანელმა ზურაბ დიასამიძემ განაცხადა, რომელმაც ტრაილერების მძღოლებთან ერთად საქართველოს სახმელეთო ტრანსპორტის სააგენტოს ხელმძღვანელს მიხეილ ხმალაძეს შეხვდა.

„შეხვედრით კმაყოფილი დავრჩი. თურქულ მხარესთან მოლაპარაკების შემდეგ გაირკვა, რომ მომავალი კვირიდან დაიწყება ნებართვების გაცემა. გარდა ამისა, საბაჟოზე გაიხსნება ნებართვების გამცემი ახალი პუნქტი, რომელიც უფრო სწრაფად გასცემს დოკუმენტაციას. ვფიქრობ, ამ პრობლემაში მოუგვარებელი არაფერია. პრობლემა მეტწილად კომუნიკაციის ნაკლებობამაც შექმნა“, -აღნიშნა დიასამიძემ.

ტრაილერების მძღოლები დღეს ბათუმში საზღვაო ტრანსპორტის სააგენტოს შენობასთან შეიკრიბნენ. მძღოლები აცხადებდნენ, რომ ორი კვირაა, ქართველი გადამზიდავებისთვის თურქულმა მხარემ ქვეყანაში შესვლის ნებართვების გაცემა გაურკვეველი მიზეზით შეაჩერა, რის გამოც ისინი თურქეთში შესვლას ვეღარ ახერხებდნენ.