საზოგადოება

მოქალაქე რომელმაც ვერ მოახერხა სასკოლო განათლების მიღება თავის დროზე, შეუძლია ახლა მიიღოს - ალექსანდრე ჯეჯელავა

საქართველოს განათლებისა და მეცნიერების მინისტრის, ალექსანდრე ჯეჯელავას განცხადებით, იმ ადამიანებისთვის, ვინც სკოლაში სიარულს ვერ ახერხებდა სხვადასხვა მიზეზის გამო, ინდივიდუალური სასწავლო პროგრამა შეიქმნება და ეს ადამიანები სწავლის გაგარძელებას შეძლებენ.

როგორც ჯეჯელავამ პროგრამის "განათლების მიღების მეორე შესაძლებლობის" პრეზენტაციის ფარგლბეში განმარტა, ამ პროგრამაში შესაძლოა, უფროსი ასაკის მოქალაქეებიც მოხვდნენ.

"პროგრამაში ჩაერთვება ნებისმიერი ადამიანი, შეიძლება ბავშვი ქუჩაში ცხოვრობდეს და სკოლაში ვერ დადიოდეს, ან ადრეული ქორწინების გამო ვერ მოახერხა სკოლის დამთავრება. ასაკობრივი შეზღუდვა არ არის - მოქალაქემ, რომელმაც ვერ მოახერხა სასკოლო განათლების მიღება თავის დროზე, შეუძლია ჩაერთოს ამ პროექტში. ასეთი ადამიანებისთვის ინდივიდუალური პროგრამები იქნება, ისინი არ ისხდებიან უმცროს კლასელებთან ერთად. მომავალში ტექნოლოგიურ სწავლებას გამოვიყენებთ და დისტანციური სწავლება იქნება", - აღნიშნა ალექსანდრე ჯეჯელავამ.

პროგრამის ფარგლებში, პირველ რიგში, მოხდება იმ ბავშვების იდენტიფიცირება, რომლებიც არ დადიან სკოლებში.

შესაძლებელი გახდება იმ მოსწავლეების დროული აღმოჩენა და პრევენცია, რომლებმაც ოჯახური თუ სხვა პირობების გამო, შეიძლება ვერ დაამთავრონ სავალდებულო 9 კლასი; ამოქმედდება სასწავლო პროგრამები მიუსაფარი ბავშვებისთვის; სავალდებულო 9 კლასის ატესტატის არმქონე პირებისთვის შემუშავდება ზოგადი განათლების ისეთი პროგრამები, რაც პროფესიული განათლების საფეხურზე სწავლის გაგრძელების წინაპირობა გახდება.

მინისტრის თქმით, უწყებამ 80 ბავშვი უკვე იპოვა და ისინი შეიყვანა სასწავლო დაწესებულებაში. ამის შემდეგ ისინი გააგრძელებენ სკოლაში სწავლას.

მონიკა დავლიანიძე