საზოგადოება

მოსახლეობის 70% ევროპაში წავა, 65%-ს კი უკან მოაბრუნებენ - გუბაზ სანიკიძე

პარლამენტის ყოფილი წევრი გუბაზ სანიკიძე ევროპასთან უვიზო მიმოსვლის ამოქმედებას გამოეხმაურა. მისი თქმით, ქართველების ევროპიდან მასობრივი დეპორტის შემთხვევაში მოსახლეობის ევროპისადმი დამოკიდებულება გაუარესდება.

„ვიზალიბერალიზაცია მივიღეთ და ახლა 70% წავა ქვეყნიდან, ამ 70%-დან 65%-ს უკან მოაბრუნებენ, ავიცრუებთ ისევ გულს ევროპაზე, რომ არ შეგვიშვეს. ჩვენთან როგორი წარმოდგენაა, ახლა მოვწყდებით და ყველა წავალთ სამუშაოდ, გამოაბრუნებენ უკან. ჩვენ ხომ ვიცით, თვითმფრინავების 80% უკან ჩამოვა“,- განაცხადა სანიკიძემ გადაცემა „ობიექტივში“.

შეგახსენებთ, რომ 28 მარტს საქართველოსა და ევროკავშირს შორის უვიზო მიმოსვლა ამოქმედდა.

საქართველოს მოქალაქეებს საშუალება ეძლევათ, შენგენის ზონის 22 ქვეყანაში, ევროკავშირის 4 არაწევრ და შენგენის კანდიდატ 4 ქვეყანაში 90 დღის განმავლობაში იმოგზაურონ. უვიზო მიმოსვლა არ ვრცელდება დიდ ბრიტანეთსა და ირლანდიაზე.

უვიზო მიმოსვლა არ გულისხმობს ევროკავშირის ქვეყნებში დარჩენას სამუშაოდ ან საცხოვრებლად.

ანა მებურიშვილი