საზოგადოება

მოსახლეობის 85% მხარს უჭერს ,,თამბაქოს კონტროლის შესახებ“ კანონის ამოქმედებას - გუგული მაღრაძე

თამბაქოს მოხმარებაზე შეზღუდვების ერთ-ერთი ინიციტორი, დეპუტატი გუგული მაღრაძე კანონის აღსრულებაში პრობლემას ვერ ხედავს.

როგორც დეპუტატმა „პალიტრანიუსის“ გადაცემაში „360 გრადუსი“ განაცხადა, აღნიშნულ კანონს თვითაღსრულების მექანიზმი გააჩნია, ვინაიდან მოსახლეობის უმეტესობა, მათ შორის თამბაქოზე დამოკიდებული, კანონის ავტორთა პათოსს იზიარებს.

„თამბაქოს კონტროლის შესახებ“ კანონის ერთ-ერთი ავტორმა ყურადღება გაამახვილა იმ მიზეზებზე, რამაც კანონში არსებული რეგულაციების შეცვლა და გამკაცრება გამოიწვია.

„ჩვენ, ინციატორებს, საქართველოს პარლამენტის უმრავლესობას და საზოგადოების მნიშვნელოვან ნაწილს, მიგვაჩნია, რომ ეს კანონი საჭიროა და შეესაბამება ჩვენი საზოგადოების განვითარების პერსპექტივასა და მოცემულ დონეს. კვლევებმა აჩვენა, რომ მოსახლეობის 85% მხარს უჭერს ასეთი კანონის შემოღებას, მათ შორის მწეველი 50%-ზე მეტია. მწეველებმაც იციან, რომ ასეთი კანონის მიღება აუცილებელია, რადგან მას წინ უძღოდა საინფორმაციო კამპანია, სამედიცინო წრეებიდან მონაცემები იმის შესახებ, რამდენი ადამიანი იღუპება, რა ხარჯებია და ა.შ. ყველა კანონის ასრულებას ახლავს რაღაც პერიოდი პრობლემები, მაგრამ ამ კანონს თვითაღსრულების მექანიზმი აქვს“, - განაცხადა გუგული მაღრაძემ.

1 მაისიდან ძალაში შევიდა კანონი, რომლის საფუძველზეც შენობა-ნაგებობების უმეტესობაში თამბაქოს მოწევა აიკრძალა.