სამართალი
მოსამართლეთა რაოდენობის გაზრდით, ასევე საქმეთა ადმინისტრირების სწორი მეთოდების შექმნით, ნელ-ნელა დავძლევთ საქმეთა ჭარბ ნაკადს - ნინო გვენატაძე
უზენაესი სასამართლოს თავმჯდომარის, ნინო გვენეტაძის განცხადებით, მიუხედავად არაერთი მიღწევისა, სასამართლო სისტემაში კვლავ გამოწვევაა, საქმეთა გაჭიანურება, ადმინისტრირების პრინციპების გაუმჯობესება და იუსტიციის სკოლის რეფორმირება.
“წლიური ანგარიში, რომელიც მართლმსაჯულების სტრატეგიის პირველ წელს მოიცავს, არის საკმაოდ მოცულობითი. ოთხი ძირითადი მიმართულება არის რაც დღენიადაგ, ყველა სარეფორმო ეტაპზე, მართლმსაჯულების ზრუნვის საგანია. ასევე ამ ზრუნვას შემოუერთდა იუსტიციის სამინისტრო და საქართველოს პარლამენტი”, – განაცხადა ნინო გვენეტაძემ.
მისი თქმით, ძალიან მნიშვნელოვანია ის საკითხები, რომელიც უკავშირდება იუსტიციის საბჭოს სამოქმედო წესების გაუმჯობესებას.
„გამოწვევები ბევრია, სასამართლოში გვაქვს ბევრი სამუშაო და ვფიქრობ, მოსამართლეთა რაოდენობის გაზრდით, ასევე საქმეთა ადმინისტრირების სწორი მეთოდების შექმნით, ნელ-ნელა დავძლევთ საქმეთა ჭარბ ნაკადს”, – აღნიშნა ნინო გვენეტაძემ.
მისივე თქმით, გამოწვევებს შორის არის მოსამართლის დამოუკიდებლობის ხარისხის გაზრდაც.
“რასაკვირველია, დამოუკიდებლობა ეს არის პირველი ნაწილი და უმთავრესი- დამოუკიდებლობა და ანგარიშვალდებულება, დამოუკიდებლობა და მიუკერძოებლობა, გამჭვირვალობა და ეფექტიანობა,“ - აცხადებს გვენეტაძე.