საზოგადოება

მოსწავლეთა 44.3% ბოლო ერთ წელიწადში ერთხელ მაინც გამხდარა ჩაგვრის მსხვერპლი - კვლევა

სახალხო დამცველის ადამიანის უფლებათა აკადემიის მიერ ჩატარებული „ადამიანის უფლებების სწავლებისა და სასწავლო გარემოს შესახებ ზოგადსაგანმანათლებლო სივრცეში“ კვლევის თანახმად, გამოკითხულ მოსწავლეთა 44.3% (464 მოსწავლე) აღიარებს, რომ ბოლო ერთ წელიწადში ერთხელ მაინც გამხდარა ჩაგვრის ან დაცინვის მსხვერპლი. ნახევარზე მეტ შემთხვევაში (54,5%) რესპონდენტები უარყოფენ ამას, ხოლო 12,2% პასუხობს: „მიჭირს პასუხის გაცემა“.

კვლევის შედეგებიდან ირკვევა, რომ 661-მა მოსწავლემ თქვა, რომ ბოლო ერთი წლის განმავლობაში, სხვა მოსწავლის მიმართ განხორციელებული ჩაგვრისა და დაცინვის შემთხვევაში არაფერი არ გაუკეთებია.

სახალხო დამცველის შეფასებით, ეს საკმაოდ მაღალი მაჩვენებელია, იმის გათვალისწინებით, რომ კვლევაში მონაწილეთა კიდევ 21,1%-მა საერთოდ უარყო ასეთი ფაქტების არსებობა.

კვლევიდან გამოიკვეთა უმოქმედობის ძირითადი მიზეზები:

მოსწავლეებს არ სურდათ ძალადობაში ჩართვა (შემთხვევათა 27,1%);

მოსწავლეებმა არ იცოდნენ, რა ეთქვათ, ან გაეკეთებინათ (შემთხვევათა 19,7%);

კვლევის მიხედვით, იმ შემთხვევაში, თუ რესპონდენტმა ბოლო ერთი წლის განმავლობაში შეამჩნია ან გაიგო, რომ სხვა მოსწავლეს ჩაგრავდნენ და დასცინოდნენ:

თავად დაეხმარა მოსწავლეს, რომელიც ჩაგვრისა და დაცინვის მსხვერპლი იყო (შემთხვევათა 37%);

შემთხვევათა 16,6%-ში დასახელდა მასწავლეების ინფორმირება;

შემთხვევათა 11,1% -ში - სკოლის დირექტორის/დირექტორის მოადგილის ან ადმინისტრაციის რომელიმე თანამშრომლის ინფორმირება;

შემთხვევათა 12,4%-ში მოსწავლეებს არაფერი გაუკეთებიათ;

ამგვარ ფაქტს არ შესწრებია (შემთხვევათა 21,1%).

სახალხო დამცველის დასკვნით, ადამიანის უფლებების, ისევე როგორც საკუთარი უფლებების, შელახვისას მოსწავლეთა ნაწილი ინერტულია.

სახალხო დამცველის შეფასებით, უმოქმედობის გამომწვევი მიზეზი ხშირად რეაგირების სტრატეგიების უცოდინრობასთან არის დაკავშირებული. ხოლო, რეაგირება ადამიანის უფლებების დარღვევაზე ასოცირდება „ამბის მიტანასთან“, რაც მოსწავლეთა ნაწილისთვის მიუღებელია, განსაკუთრებით ბიჭი მოსწავლეების შემთხვევაში