კომენტარი

მოველით, რომ რუსეთი ტვირთების მონიტორინგის შესახებ შეთანხმების სრულყოფილად შესასრულებლად ნაბიჯებს გადადგამს - მიხეილ ჯანელიძე

საქართველოს საგარეო საქმეთა მინისტრის, მიხიელ ჯანელიძის განცხადებით, ქართული მხარე ელოდება, რომ ტვირთების მონიტორინგის შესახებ შეთანხმების სრულყოფილად შესასრულებლად, რუსეთის ფედერაცია შესაბამის ნაბიჯებს გადადგამს.

ამის შესახებ ჯანელიძემ „იმედის“ ეთერში გრიგორი კარასინის მიერ გაკეთებული განცხადების კომენტირებისას განაცხადა.

მინისტრის განმარტებით, საქართველო დიდი ხანია მზად არის, შეასრულოს ნაკისრი ვალდებულებები, რომელიც 2011 წლის შეთანხმებიდან გამომდინარეობს.

„ჩვენ მოველით, რომ რუსეთის ფერედაცია გადადგამს შესაბამის ნაბიჯებს ტვირთების მონიტორინგის შესახებ შეთანხმების სრულყოფილად შესასრულებლად.

ჩვენ ასევე მზად ვართ, ხელი მოვაწეროთ კონტრაქტს შუამავალ შვეიცარულ კომპანიასთან, რომელმაც უნდა უზრუნველყოს ამ შეთანხმების იმპლემენტაცია. მოველით, რომ ეს ძირითადი შეთანხმებაც და შესაბამისი კონტრაქტიც შესრულდება ყველა მხარის მიერ. ცალმხრივად, ამ ვალდებულებების შესრულება არის შეუძლებელი და უნდა იყოს ყველა მხარის სრული თავსებადობა იმ შეთანხმებასთან, რომელიც 2011 წელს გაფორმდა“, -აღნიშნა მიხეილ ჯანელიძემ.

მონიკა დავლიანიძე