საზოგადოება

მოვუწოდებ მერიასა და საკრებულოს, დაუყოვნებლივ შევქმნათ ჯგუფი და შევიმუშაოთ ძალიან მკაფიო წესები გარევაჭრობის მოსაწესრიგებლად - ალეკო ელისაშვილი

თბილისის საკრებულოს დამოუკიდებელმა დეპუტატმა ალეკო ელისაშვილმა მიმართა თბილისის მერიასა და ქალაქის საკრებულოს, შექმნას სპეციალური კომისია გარევაჭრობის დასარეგულირებლად.

ამის შესახებ მან დღევანდელ პრესკონფერენციაზე ისაუბრა.

„გარევაჭრობა ნებისმიერი ქალაქის ურბანული ელემენტია, მაგრამ განსხვავებით თბილისისგან, იქ არის ძალიან მკაფიო წესები, რით შეიძლება ვაჭრობა და რით არა. თბილისში არსებობს მხოლოდ ერთი ფარატინა ქაღალდი, რომელშიც წერია 5 წინადადება და ამ ხნის განმავლობაში ვერ ჩამოვაყალიბეთ ზუსტი წესები. გარევაჭრობასთან ბრძოლა არის სიღარიბესთან ბრძოლა, ამიტომ ჩემი მოწოდებაა მერიისადმი და მე უკვე მივმართე საკრებულოს, რომ დაუყოვნებლივ შევქმნათ ჯგუფი და შევიმუშაოთ ძალიან მკაფიო წესები გარევაჭრობის მოსაწესრიგებლად“, - განაცხადა ელისაშვილმა.

მისი თქმით, გარევაჭრობის წინააღმდეგ გამოყენებული ბრძოლის მეთოდი „ბრიყვულია“. ელისაშვილმა აღნიშნა, რომ მხოლოდ მკაფიო რეგულაციის დაწესებით შესაძლებელია გარემოვაჭრეებს პრეტენზია წაუყენო.

ელისაშვილმა განაცხადა, რომ თუ საკრებულო და მერია მის წინადადებას არ გამოეხმაურებიან, ის პრეზენტაციას გამართავს, სადაც საკუთარ ხედვას წარადგენს.

ანა მებურიშვილი