საზოგადოება

მსჯავრდებულები ძალიან შეურაცხყოფილები არიან იმის გამო, რომ იყო ცრუ ბრალდება - თეა სირაძე „ადამიანის უფლებათა ცენტრის“ ანგარიშზე

ყოფილმა მსჯავრდებულმა თეა სირაძემ რუსთავში, ქალთა მე-5 კოლონიასთან, საპყრობილეში არსებულ მდგომარეობასთან დაკავშირებით საგანგებო განცხადება გააკეთა. მან სიცრუე უწოდა „ადამიანის უფლებათა ცენტრის“ მიერ გავრცელებული ინფორმაცია, რომ შემოწმების მიზნით პატიმარ ქალებს აშიშვლებენ, ბუქნების გაკეთებას სთხოვენ და დამამცირებელ პროცედურებს უტარებენ.

სირაძის თქმით, მან პირადად გადაამოწმა ქალთა მე-5 დაწესებულებაში არსებული ვითარება და აღნიშნა, რომ განგაშის საფუძველი არ არსებობს. მისი თქმით, „ადამიანის უფლებათა ცენტრის“ ანგარიშით თავად მსჯავრებულები არიან შეურაცხყოფილები და 120 მსჯავრდებული „ადამიანის უფლებათა ცენტრისგან“ და სახალხო დამცველისგან საჯაროდ ბოდიშის მოხდის მოთხოვნით შიმშილობს.

სირაძის თქმით, მას აინტერესებს, რომ თუკი არსებობდა ასეთი პრობლემა, რატომ ვერ მოახდინა „ადამიანის უფლებათა ცენტრმა“ ამაზე რეაგირება 4 თვის განმავლობაში, როცა ის რესოციალიზაციის პროგრამით საპატიმრო დაწესებულებაში იმყოფებოდა.

„დაწესებულებიდან შემოვიდა ზარი ჩემს ტელეფონზე და მათი ოჯახის წევრებისგან, რომ ძალიან შეურაცხყოფილები არიან იმის გამო, რომ იყო ცრუ ბრალდება, თითქოს არის საგანგაშო სიტუაცია, თითქოსდა ქალბატონებს ხდიან და ფსიქოლოგიურ ზეწოლას ახდენენ. მე ვიყავი დაწესებულებაში და მსჯავრდებულების განცხადება და ხელწერილები უნდა ჩავაბარო სახალხო დამცველთან და ადამიანის უფლებათა ცენტრში. ადამიანის უფლებათა ცენტრი იყო 4 თვის წინ რესოციალიზაციის პროგრამით შემოსული, რომ მსჯავრდებულებს თიხაზე ემუშავათ. მაინტერესებს, თუ ასეთი სიტუაცია იყო დაწესებულებაში, მაშინ რა დროს რესოციალიზაცია იყო. 4 თვეა ამ დაწესებულებაში იყო ეს პროგრამა, თუ ეს პრობლემა იყო, რატომ არ მოახდინეს მაშინ რეაგირება?!

მე ადამიანის უფლებათა დაცვის ასოციაციის თავმჯდომარე ვარ, მაგრამ ამასთანავე ვარ ყოფილი მსჯავრდებული თეა სირაძე. მართლა გაოგნებული ვიყავი, მართლა ვიფიქრე, რომ შეიძლება რაღაც შეიცვალა. მოვედი, რომ გადამემოწმებინა ეს ინფორმაცია და ეს არის ცრუ განგაში. მსჯავრდებულები ითხოვენ საქვეყნოდ ბოდიშის მოხდას. ისინი შიმშილობენ, ამ ცენტრმა მსჯავრდებულებს, მშობლებს, შვილებს საქვეყნოდ მოუხადონ ბოდიში, მანამდე არ შეწყდება შიმშილი“, - განაცხადა სირაძემ.

მან მოუწოდა სახალხო დამცველის აპარატსა და „ადამიანის უფლებათა ცენტრს“, გააკეთონ ის საქმე, რაც მათ აკისრიათ.

„შეეშვან დაწესებულებაში ძრომიალობას და გააკეთონ ის, რაც სინამდვილეშია გასაკეთებელი, შეწყალების კომისიას მიმართონ და გაარკვიონ სიტუაცია, რატომ არ ხდება შეწყალება. რატომ არ ხდება ხელმეორედ გამოძიება საქმის, დაეხმარონ მსჯავრდებულებს, რომ ერთხელ და სამუდამოდ ეღირსოთ თავისუფლება. ჩემზე კარგად არავინ არ იცის, რა ხდება ამ დაწესებულებაში და შეეშვან ქალბატონ ნესტან ბერულაშვილსა და ბატონ კახა კახიშვილს. ეს ორი ადამიანი არის ღვთის წყალობა. ეს არ არის ციხე, ეს სამოთხეა, იმდროინდელ ციხესთან შედარებით, სად იყვნენ ადრე როდესაც აწამებდნენ, საშინელებას რომ მართავდნენ ხალხს. ხომ შემოდიოდნენ, რატომ არ აკეთებდნენ განცხადებას, რატომ არ კიოდნენ? ახლა, როცა სიმშვიდეა, ხალხმა ამოისუნთქა და აღარაფრის არ ეშინია, ახლა უნდათ, რომ ეს დაწესებულება გაანადგურონ? ბოლომდე ვიბრძოლებ და დავამტკიცებ, რომ დაწესებულებაში მსგავსი რამ არ ხდება.საქვეყნოდ მოიხადონ ბოდიში, დაამშვიდონ ოჯახის წევრები, დაამშვიდონ პატიმრები“, -განაცხადა სირაძემ.

ცნობისთვის, 28 ივნისს „ადამიანის უფლებათა ცენტრისა“ და სახალხო დამცველის აპარტის ანგარიში „ქალი და არასრულწლოვანი პატიმრების მდგომარეობა საქართველოში“ 2 დღის წინ გამოქვეყნდა. დოკუმენტის თანახმად, ქალთა პენიტენციურ დაწესებულებაში შემოწმების მიზნით პატიმართა გაშიშვლების პრაქტიკა კვლავ გამოიყენება. ამას გამოეხმაურა სასჯელაღსრულებისა და პრობაციის სამინისტრო. უწყებამ განაცხადა, რომ არ იზიარებს ანგარიშში მითითებულ დასკვნებს, ხოლო პატიმართა შემოწმების მოქმედი პროცედურა ევროპულ სტანდარტებს შეესაბამება.