საზოგადოება

მშენებლობა მხოლოდ აგურის აგურზე დადება არაა - სეისმოლოგიურ ცენტრში აფრთხილებენ, რომ ახლად აშენებულმა კორპუსებმა შესაძლოა ძლიერ ბიძგებს ვერ გაუძლონ

გახშირებული მიწისძვრების გამო, სეისმოლოგიურ ცენტრში აფრთხილებენ, რომ ახლად აშენებულმა კორპუსებმა შესაძლოა ძლიერ ბიძგებს ვერ გაუძლონ. გასული 24 საათის განმავლობაში საქართველოში 5 მიწისძვრა დაფიქსირდა.

სეისმოლოგიურმა ცენტრმა ხელისუფლებას მოუწოდა, დააწესოს სპეციალური რეგულაციები, რომლითაც კორპუსების სეისმოლოგიურობა მკაცრად გაკონტროლდება.

„თბილისიც სეისმურად აქტიურია. ამიტომ ჩვენი მოვალეობა არის, რომ გავაფრთხილოთ მოსახლეობა, გადაწყვეტილების მიმღებებიც და ა.შ, რომ ნუ ვეთამაშებით სამშენებლო და ინფრასტრუქტურულ ბიზნესს. ასეთ ტერიტორიაზე როგორიც საქართველოა, სადაც ვცხოვრობთ, კავკასიაში, სამშენებლო ინდუსტრია უნდა იყოს განვითარებული, რეგულაციები უნდა იყოს ძალიან მკაცრი იმისთვის, რომ დავიცვათ მოსახლეობა. სერიოზული დარღვევებია კვლევით კომპონენტში. იმიტომ, რომ მშენებლობა მხოლოდ აგურის აგურზე დადება არ არის და არქიტექტურა არ არის. ლამაზი სახლები ძალიან მოგვწონს, მაგრამ მთავარია, ეს სახლები ფეხზე იდგეს, როდესაც მიწისძვრა მოხდება. ამიტომ საინჟინრო კუთხით არის ყურადღება მისაქცევი“,-განაცხადა დედამიწის შემსწავლელ მეცნიერებათა ინსტიტუტისა და სეისმოლოგიის ეროვნული ცენტრის დირექტორმა თეა გოდოლაძემ.